PAMARÉNTAH KOTA SUKABUMI MEUNANG PIALA SANITASI AWARD TAUN 2018

Reporter / Redaktur : ENDANG SUMARDI

Pamaréntah Kota Sukabumi, meunang Piala Sanitasi Award Taun 2018, ti Pamaréntah Puseur. Ěta piala téh dipasrahkeun ku Dirjén (Diréktur Jéndral) Cipta Karya Kamentrian PUPR (Pekerjaan Umum jeung Paimahan Rahayat) RI, Dr. Ir. Danis Hidayat Sumadilaga, M.Ěng.Sc., ka Wali Kota Sukabumi, H. Achmad Fahmi, bareng jeung anu meunang Piala Sanitasi Award Taun 2018 lianna, cindekna dina acara City Sanitation Summit XVIII, di Hotél Luxury Kota Jambi Propinsi Jambi, tanggal 25 Oktober 2018.

Wali Kota Sukabumi, H. Achmad Fahmi dibarengan Kapala DLH (Dines Lingkungan Hirup) Kota Sukabumi, Drs. Adil Budiman, M.Si., ngucapkeun sukur jeung ngahaturkeun nuhun, ku ditarimana éta piala, sakaligus sabagé sala sahiji kareueus jeung tangtangan, lantaran ka hareupna kudu leuwih museur jeung ngaronjatkeun pangwangunan sanitasi ka nu leuwih hadé deui. Sabab ngaliwatan pangwangunan sanitasi anu leuwih hadé téh, bisa nyiptakeun sakaligus ngaronjatkeun darajat kaséhatan sarta kabersihan lingkungan jeung masarakat. Tah ku lantaran kitu, Wali Kota Sukabumi ngaharepkeun sakaligus meredih ka sakumna élemén masarakat jeung SKPD (Satuan Kerja Parangkat Daérah) sarta instansi katut lembaga nu aya kaitannana di Kota Sukabumi, sangkan salawasna usaha satékah polah ngoméan jeung ngawangun sanitasi di Kota Sukabumi, kaasup ngaronjatkeun PHBS (Parilaku Hirup Bersih jeung Séhat).

Salajuna dijelaskeun, Pamaréntah Kota Sukabumi salawasna usaha satékah polah ngawujudkeun pangwangunan program paningkatan sarana jeung prasarana cai bersih sarta sanitasi lingkungan di Kota Sukabumi, pikeun ngahontal targét kaséhatan lingkungan100-0-100, nya éta 100 peresén aksés cai nginum, 0 peresén pamukiman kumuh, sarta 100 peresén sanitasi anu pantes jeung hadé di sakabéh wewengkon Kota Sukabumi. Lian ti éta ogé dijelaskeun, program paningkatan sarana jeung prasarana cai bersih sarta sanitasi lingkungan 100-0-100 ieu téh, di Kota Sukabumi lumangsung hadé, utamana pikeun pangwangunan sarana jeung prasarana cai bersih masarakat. Lantaran Pamaréntah Kota Sukabumi salawasna usaha satékah polah merhatikeun jeung madulikeun masarakat, hususna nu darumuk di wewengkon-wewengkon anu kakurangan cai bersih.

Leuwih jauh Wali Kota Sukabumi ngajelaskeun, pangwangunan sarana jeung prasarana cai bersih sarta sanitasi lingkungan di Kota Sukabumi, dilaksanakeun langsung ku KSM (Kelompok Swadaya Masarakat) Kalurahan masing-masing, utamana nu geus mibanda légalitas formal jeung badan hukum, luyu jeung katangtuan paraturan katut undang-undang anu ditetepkeun, sarta saméméhna geus ngalaksanakeun kontrak gawé jeung Pamaréntah Kota Sukabumi.

Leave a Reply