PROGRAM HIBAH CAI NGINUM GEUS MÉRÉ PANGARUH ANU HADÉ

Reporter / Redaktur : ENDANG SUMARDI

Wali Kota Sukabumi, H. Achmad Fahmi nandeskeun, Program Hibah Cai Nginum geus méré pangaruh anu hadé kana kamekaran sistim panyadiaan cai nginum di kota jeung kabupatén. Lantaran maksud jeung tujuan dilaksanakeunnana éta program téh, nya éta pikeun ngaronjatkeun cakupan palayanan cai nginum papipahan, anu diutamakeun pikeun MBR (Masarakat Berpenghasilan Rendah), dina raraga usaha ngaronjatkeun darajat jeung ajén kaséhatan masarakat.

Ěta panandesan Wali Kota Sukabumi téh, ditepikeun satutas milu Lokakarya Paminatan Palaksanaan Program Hibah Cai Nginum Pakotaan Taun 2019, anu dibuka sacara resmi ku Dirjén (Diréktur Jéndral) Ciptakarya Kamentrian PUPR (Pekerjaan Umum jeung Paimahan Rahayat) RI, Dr. Ir. Danis H. Sumandilaga, M.Ěng.Sc., cindekna tanggal 1 Novémber 2018, di Hotél Kartika Chandra Jakarta. Kagiatan éta téh diiluan ku para Wali Kota katut Bupati, sarta para Ketua DPRD jeung Dirut PDAM (Diréktur Utama Pausahaan Daérah Air Minum) sa Indonésia.

Saterusna ditandeskeun, Program Hibah Cai Nginum ieu téh, ngarupakeun sala sahiji strategi pamaréntah, hususna dina raraga ngahangkeutkeun jeung nambahan jumlah sambungan imah anyar, ngaliwatan panerapan OBA (Output Based Aid) atawa méré hibah anu didasarkeun kana kinerja anu kaukur. Disagigireun ti éta, ogé dina raraga usaha ngahontal target universal aksés 100 peresén cai nginum anu aman. Salajuna ditandeskeun, ku ayana éta program téh, Pamaréntah Kota jeung Kabupatén diwajibkeun ngalaksanakeun sakaligus ngaronjatkeun aksés cai nginum anu pantes jeung aman, ngaliwatan pamasangan sambungan imah anyar jeung jaringannana.

Leuwih jauh Wali Kota Sukabumi nandeskeun, Pamaréintah Kota Sukabumi salawasna usaha satékah polah ngalaksanakeun pangwangunan jeung program ngahangkeutkeun sarana jeung prasarana cai bersih sarta sanitasi lingkungan 100-0-100, nya éta 100 peresén aksés cai nginum, 0 peresén pamukiman kumuh, sarta 100 peresén sanitasi anu pantes jeung hadé. Salajuna Wali Kota Sukabumi ngaharepkeun, ku dilaksanakeunnana pangwangunan jeung éta program téh, bisa ngaronjatkeun PHBS (Parilaku Hirup Bersih jeung Séhat) masarakat, hususna di Kota Sukabumi. Lian ti éta, Wali Kota Sukabumi ogé ngajelaskeun, éta program paningkatan sarana jeung prasarana cai bersih sarta sanitasi lingkungan 100-0-100 téh, husus di Kota Sukabumi geus lumangsung sacara hadé, utamana pangwangunan sarana jeung prasarana cai bersih pikeun masarakat.

Leave a Reply