WAKIL WALI KOTA SUKABUMI MILUAN PALATIHAN JEUNG PAMEKELAN KAPALA DAÉRAH

Reporter / Redaktur : ENDANG SUMARDI

Wakil Wali Kota Sukabumi, H. Andri S. Hamami, S.H., M.H., salila 3 poé cindekna ti tanggal 12 nepi ka tanggal 14 Novémber 2018, miluan Palatihan jeung Pamekelan Kapala Daérah Hasil Pilkada (Pamilihan Kapala Daérah) Bareng Taun 2018 jeung Ketua DPRD Angkatan Munggaran Taun 2018, anu ngangkat téma, Ngaliwatan Pamekelan Kapamingpinan Pamaréntahan Dalem Negri, Urang Wujudkeun Tata Kalola Pamaréntahan anu Bersih, Ěféktif, Démokratis jeung Dipercaya. Salian ti dilaksanakeun Palatihan jeung Pamekelan Kapala Daérah jeung Ketua DPRD, ogé dilaksanakeun palatihan pikeun garwa Bupati katut garwa Wali Kota salila 2 poé, cindekna dina tanggal 13 jeung 14 Novémber 2018.

Ěta palatihan jeung pamekelan anu dicalagarakeun ku BPSDM (Badan Pangembangan Sumber Daya Manusa) Kemendagri (Kementrian Dalem Negri) téh, dibuka sacara resmi ku Mendagri (Mentri Dalem Negri), Tjahjo Kumolo, S.H., cindekna tanggal 12 Novémber 2018, di Kantor BPSDM Kemendagri, ditandaan ku Nakol Goong. Ěta palatihan jeung pamekelan téh diiluan ku 121 urang pamilon, anu ngawengku ti Bupati, Wakil Bupati, Wali Kota, Wakil Wali Kota katut Ketua DPRD.

Sedengkeun anu jadi nara sumber dina éta palatihan jeung pamekelan téh, ngawengku ti Mendagri; Menkopolhukam (Mentri Koordinator Widang Politik, Hukum jeung Kaamanan); Menko PMK (Mentri Koordinator Widang Pangwangunan Manusa jeung Kabudayaan); sarta MenPAN-RB (Mentri Pandayagunaan Aparatur Nagara jeung Réformasi Birokrasi).

Salajuna para Pajabat Ěsélon 1 Kemendagri; Dirjén Kemenkeu (Diréktur Jéndral Kementrian Keuangan); BPK (Badan Pangawas Kauangan); KPK (Komisi Pangbarantasan Koropsi); Jampidsus (Jaksa Agung Muda Tindak Pidana Khusus) Kajasaan Agung; BNPT (Badan Nasional Pananggulangan Térorismeu); BNN (Badan Narkotika Nasional); jeung Pakar Média Komunikasi.

Wakil Wali Kota Sukabumi, disela-sela éta palatihan jeung pamekelan téh, ngajelaskeun kacida ngabagéakeun katut pangajén anu saluhur-luhurna, ku dilaksanakeunnana éta palatihan jeung pamekelan téh. Sabab bisa muka wawasan sarta silaturahmi jeung silih tukeur pikiran, hususna ngeunaan panyalagaraan pamaréntahan anu hadé. Saterusna dijelaskeun, éta palatihan jeung pamekelan téh kacida dibutuhkeunnana, supaya teu salah léngkah jeung bisa ngajalankeun roda pamaréntahan sacara hadé, luyu jeung amanat Undang-Undang Dasar 1945, anu pamustungannana bisa museur kana ngaronjatna kasajahtraan masarakat.

Lian ti éta, ku dilaksanakeunnana éta palatihan jeung pamekelan téh, bisa nambahan élmu jeung wawasan, hususna ngeunaan tata kalola pamaréntahan anu hadé jeung ngaronjatkeun kasajahtraan masarakat. Tah ku lantaran kitu, hasil tina éta palatihan jeung pamekelan téh, baris diterapkeun jeung dimekarkeun sacara optimal di Kota Sukabumi. Maksud jeung tujuannana, sangkan tata kalola pamaréntahan jeung paningkatan kasajahtraan masarakat di Kota Sukabumi, bisa dilakanakeun sacara jeung optimal.

Leave a Reply