WALI KOTA SUKABUMI NGAHAREPKEUN PAMILU TAUN 2019 DI KOTA SUKABUMI BISA LUMANGSUNG LANCAR

Reporter / Editor : ENDANG SUMARDI

Wali Kota Sukabumi, H. Achmad Fahmi ngaharepkeun, Pamilu (Pamilihan Umum) Taun  2019 nu bakal datang, di Kota Sukabumi bisa lumangsung lancar sarta aman jeung rukun. Ěta harepan Wali Kota Sukabumi téh, ditepikeun dina Déklarasi Pamilu Taun 2019 anu Bersih jeung ngabogaan Integritas anu hadé, cindekna tanggal 25 Novémber 2018, di aréa Car Fréé Day, Jalan R. Syamsudin, S,H, Kota Sukabumi.

Déklarasi Pamilu Taun 2019 anu dicalagarakeun ku Bawaslu (Badan Pangawas Pamilu) Kota Sukabumi téh, ditandaan ku ngapungkeun balon jeung panandatanganan déklarasi dina sepanduk gedé, ku Wali Kota Sukabumi, Wakil Wali Kota Sukabumi, unsur FKPD (Forum Komunikasi Pingpinan Daérah) Kota Sukabumi, Ketua DPRD Kota Sukabumi, katut pawakilan ti 16 Parpol (Partéy Politik) Pamilon Pamilu Taun 2019.

Saterusna Wali Kota Sukabumi ngaharepkeun, Pamilu anu sakeudeung deui baris dilaksanakeun malah tahapannana geus dimimitian, Kota Sukabumi bisa jadi Palaksana Pamilu anu pang hadéna. Tah ku lantaran kitu, Wali Kota Sukabumi meredih ka sakumna Aparat Pamaréntah, Panyalagara Pamilu jeung Pamilon Pamilu di Kota Sukabumi, sangkan ngaronjatkeun sumanget jeung sabilulungan, sarta siap ngalaksanakeun Pamilu anu Bersih jeung ngabogaan Integritas anu hadé.

Sedengkeun Kapolres Sukabumi Kota, AKBP Susatyo Purnomo Condro, S.H., S.I.K., M.Si. ngajelaskeun, aya sababaha hal utama anu kudu dipahatikeun ku sakumna pihak dina Déklarasi Pamilu anu Bersih jeung ngabogaan Integritas anu hadé, nya éta ngajaga, mastikeun jeung ngalaksanakeun kompanyeu sacara sopan jeung adab, pikeun nyiptakeun Pamilu anu jujur, adil, aman, tartib jeung rukun. Saterusna nolak atawa teu milampah sagala bentuk politisasi sara, monéy politic, kompanyeu hideung, tindak kakerasan, intimidasi, provokasi jeung sagala bentuk kagiatan Pamilu anu dilarang. Lian ti éta ogé ngahormat upaya-upaya hukum anu ditetepkeun luyu jeung katangtuan undang-undang, tunduk jeung patuh kana sagala katangtuan anu ditetepkeun, sarta siap narima sangsi luyu jeung aturan katut undang-undang.

Salajuna Ketua Bawaslu Kota Sukabumi, H. Ending Muhidin, S.Sos. ngajelaskeun, ilu biung masarakat kacida pisan nangtukeunnana dina palaksanaan Pamilu Taun 2019. Tah ku sabab kitu, masarakat sangkan  nolak jeung nyingkahan rupa-rupa hal anu dilarang dina palaksanaan Pamilu. Disagigreun ti éta ogé dijelaskeun, Pamilu Taun 2019 nu bakal datang téh baris dilaksanakeun bareng, nya éta Pamilu Persidén katut Wakil Persidén RI jeung Pamilu Anggota DPR RI katut DPD RI, sarta DPRD Propinsi, DPRD Kota jeung DPRD Kabupatén. Tah ku lantaran kitu, mangsa palaksanaan kompanyeu Pamilu Taun 2019 téh tangtu baris leuwih panjang tina mangsa palaksanaan kompanyeu Pamilu taun-taun saméméhna.

Leave a Reply