WALI KOTA SUKABUMI MILUAN PAMEKELAN KAPAMINGPINAN PAMARÉNTAHAN DALEM NEGRI

Reporter / Editor : ENDANG SUMARDI

Satutas Wakil Wali Kota Sukabumi, H. Andri S. Hamami, S.H., M.H. katut garwana salila 3 poé cindekna ti tanggal 12 nepi ka tanggal 14 Novémber 2018 miluan Palatihan jeung Pamekelan Kapala Daérah Angkatan Ka 1 Taun 2018, salajuna giliran Wali Kota Sukabumi, H. Achmad Fahmi katut garwana salila 4 poé cindekna ti tanggal 25 nepi ka tanggal 28 Novémber 2018 miluan Pamekelan Kapamingpinan Pamaréntahan Dalem Negri Angkatan Ka 2 Taun 2018, anu ngangkat téma, Ngaliwatan Pamekelan Urang Wujudkeun Tata Kalola Pamaréntahan anu Bersih, Ěféktif, Démokratis jeung Kapercaya.

Pamekelan anu dicalagarakeun ku BPSDM (Badan Pangembangan Sumber Daya Manusa) Kemendagri (Kementrian Dalem Negri) téh, dibuka sacara resmi ku Mendagri (Mentri Dalem Negri), Tjahjo Kumolo, S.H., di Kantor BPSDM Kemendagri, ditandaan ku Nakol Goong. Ěta pamekelan téh diiluan ku 150 pamilon, anu ngawengku ti Bupati, Wakil Bupati, Wali Kota, Wakil Wali Kota katut Ketua DPRD sa Indonésia.

Anapon anu jadi nara sumber dina éta pamekelan téh, diantarana Mendagri, Menkopolhukam (Mentri Koordinator Widang Politik, Hukum jeung Kaamanan), Menko PMK (Mentri Koordinator Widang Pangwangunan Manusa jeung Kabudayaan), MenPAN-RB (Mentri Pandayagunaan Aparatur Nagara jeung Réformasi Birokrasi), Menteri Kauangan, Kapolri, KPK (Komisi Pangbarantasan Koropsi) jeung sakumna Widang Kemendagri.

Mendagri, Tjahjo Kumolo, S.H., dina biantarana ngajelaskeun, pamekelan ieu téh ngarupakeun sala sahiji skala prioritas Kemendagri. Sedengkeun maksud jeung tujuan dilaksanakeunnana ieu pamekelan téh, pikeun méré pamahaman bareng nu aya tumalina jeung fungsi Kemendagri, sarta ngawangun hubungan Tata Kalola Pamaréntahan Daérah jeung Pamaréntah Puseur. Disagigireun ti éta, ogé pikeun ngaronjatkeun kamampuhan jeung ajén Aparatur Nagara, sarta sabagé sala sahiji wujud nyata réformasi mental, pikeun ngaronjatkeun pangaweruh jeung wawasan Kapala Daérah, dina ngurus daérahna masing-masing.

Sedengkeun Wali Kota Sukabumi, H. Achmad Fahmi ngajelaskeun, ieu pamekelan téh kacida gedé pisan mangpaatna, utamana dina upaya ngaronjatkeun kamampuhan jeung wawasan sarta ajén SDM (Sumber Daya Manusa) Kapala Daérah. Tah ku éta pamekelan téh, Kapala Daérah bisa ngajalankeun birokrasi, luyu jeung anu dipiharep ku rahayat katut régulasi anu ditetepkeun. Lantaran rupa-rupa matéri anu ditepikeun dina ieu pamekelan téh kacida hadéna sarta ngabogaan ajén anu luhur. Salian ti éta, dina ieu pamekelan téh ogé dilaksanakeun pangbahasan kawijakan Kemendagri dina rupa-rupa widang, diantarana Widang Sekertaris Jéndral, Widang Pangawasan, sarta Widang Pangembangan SDM jeung Otonomi Daérah.

Leave a Reply