KAJAHATAN NARKOBA DI INDONÉSIA NIMBULKEUN KARUGIAN MATERIAL AMPIR NGAHONTAL RP. 63 TRILIUN

Reporter / Ěditor : ENDANG SUMARDI

Sakumaha anu ditandeskeun ku Wakil Wali Kota Sukabumi, H. Andri S. Hamami, S.H., M.H., kajahatan Narkoba di Indonésia nimbulkeun karugian material ampir ngahontal Rp. 63 triliun, anu ngawengku karugian balanja narkoba, waragad pangobatan alatan narkoba, waragad réhabilitasi jeung waragad lianna. Anu kacida mangpaurkeun jeung ngahariwangkeun, kajahatan narkoba téh geus ngababi buta jeung ngaraksuk ka rupa-rupa lapisan masarakat, boh di kota boh di désa jeung pakampungan, ti mimiti masarakat déwasa jeung rumaja nepi ka barudak, sarta lain ka masarakat biasa wungkul, tapi ogé ka aparat jeung pajabat anu kudu jadi panutan pikeun sakumna lapisan masarakat. Tah ku lantaran kitu, kajahatan narkoba téh kudu sagancangna dieureunkeun, dilawan, dibasmi jeung ditumpes nepi ka akar-akarna ku sakumna pihak, sabab éta kajahatan téh teu meunang diantep.

Panandesan Wakil Wali Kota Sukabumi éta téh, ditepikeun dina biantara basa muka sacara resmi Panyuluhan Bahaya Narkoba Pikeun Pamuda Taun 2018, anu dilaksanakeun ku Disporapar (Dines Pamuda, Olahraga jeung Pariwisata) Kota Sukabumi, di Méétingroom Balcony Hotél Sukabumi, anyar-anyar ieu. Anapon nu jadi nara sumber dina éta panyuluhan téh, diantarana ti Disporapar Kota Sukabumi, Sat Narkoba Polres Sukabumi Kota, Dines Kaséhatan Kota Sukabumi, jeung KPA (Komisi Pananggulangan AIDS) Kota Sukabumi.

Sedengkeun Kapala Disporapar Kota Sukabumi, H. Adang Taufik, S.H., M.Si. ngajelaskeun, ieu panyuluhan téh ngarupakeun program rutin taunan Disporapar Kota Sukabumi. Maksud jeung tujuannana, sabagé sala sahiji usaha pangbinaan ka para nonoman, sangkan bisa nyingkahan jeung ngajauhan tina bahaya panyalahgunaan narkoba. Lantaran masalah narkoba téh ngarupakeun ancaman anu kacida dariana pikeun masarakat, hususna para nonoman. Tah ku sabab kitu, Disporapar Kota Sukabumi salawasna usaha satékah polah sakaligus ilu biung jeung ngalaksanakeun panyegahan bahaya panyalahgunaan narkoba, ngaliwatan panyuluhan ka para nonoman.

Salajuna Kapala Disporapar Kota Sukabumi ngaharepkeun, ku dilaksanakeunnana panyuluhan téh, para nonoman di Kota Sukabumi bisa paham jeung apal kana pangaruh tina panyalahgunaan narkoba, nya éta bisa ngarusak méntal jeung moral, sarta bisa katerap kasakit HIV jeung AIDS, anu nepi ka kiwari can aya ubarna anu pas jeung jétu. Disagigireun ti éta, ogé bisa apal kana hukuman jeung sangsi pikeun anu ngajual, anu ngédarkeun jeung anu ngagunakeun narkoba. Tah ku éta hal téh, para nonoman hususna di Kota Sukabumi, bisa nyingkahan jeung ngajauhan tina bahaya panyalahgunaan narkoba.

Leave a Reply