DKP3 KOTA SUKABUMI GEUS NEBARKEUN DEUI 200 RÉBU BURAYAK LAUK KA SAJUMLAH WAHANGAN JEUNG SUSUKAN

Reporter / Ěditor : ENDANG SUMARDI

Widang Paikanan jeung BBI (Balé Binih Ikan) DKP3 (Dines Katahanan Pangan, Patanian jeung Paikanan) Kota Sukabumi, geus nebarkeun deui 200 rébu burayak lauk, ka sajumlah wahangan jeung susukan nu aya di 7 kalurahan anu sumebar di 5 kacamatan di Kota Sukabumi, sawatara poé ka tukang. Kapala Widang Paikanan DKP3 Kota Sukabumi, Ir. Budi Buntaran, M.Si. ngajelaskeun, nebarkeun burayak lauk ka sajumlah wahangan jeung susukan di Kota Sukabumi téh dilaksanakeun secara rutin satiap taun. Maksud jeung tujuannana, sabagé sala sahiji upaya pikeun ngajaga ékosistim sarta lingkungan wahangan jeung susukan di Kota Sukabumi.

Anapon jenis burayak lauk anu ditebarkeun ka sajumlah wahangan jeung susukan di Kota Sukabumi téh, ngawengku ti burayak lauk Tawés, Lalawak, Nilem jeung Nila, hasil produksi BBI DKP3 Kota Sukabumi, cindekna di wewengkon Kalurahan Sukakarya, Kacamatan Warudoyong, Kota Sukabumi. Salajuna dijelaskeun, éta burayak lauk anu ditebarkeun ka sajumlah wahangan jeung susukan di Kota Sukabumi téh, ngarupakeun burayak lauk unggulan anu diproduksi ku BBI DKP3 Kota Sukabumi. Kapala Widang Paikanan DKP3 Kota Sukabumi ngaharepkeun, ku ditebarkeunnana éta burayak lauk téh, bisa mawa mangpaat pikeun sakumna pihak, boh pamaréntah boh masarakat Kota Sukabumi, hususna dina upaya ngajaga ékosistim sarta lingkungan wahangan jeung susukan di Kota Sukabumi.

Nyigeung jumlah burayak lauk anu diproduksi ku BBI DKP3 Kota Sukabumi dina taun 2018 ieu, sakumaha diungkabkeun ku Kapala Widang Paikanan DKP3 Kota Sukabumi ngahontal 1,5 juta burayak lauk rupa-rupa jenis lauk, sarta dina satiap taunna salawasna ngaleuwihan targét anu ditetepkeun. Salian ti éta, Widang Paikanan jeung BBI DKP3 Kota Sukabumi, salawasna usaha satékah polah nebarkeun rupa-rupa burayak lauk ka sajumlah wahangan jeung susukan di Kota Sukabumi,

Sedengkeun rupa-rupa jenis burayak lauk anu diproduksi ku BBI DKP3 Kota Sukabumi téh, dipasarkan ka sajumlah wewengkon, diantarana ka wewengkon Kabupatén Sukabumi, Cianjur jeung Bogor sarta wewengkon liana, gumantung pésenan jeung paménta. Tah ku lantaran kitu, Widang Paikanan jeung BBI DKP3 Kota Sukabumi, salawasna usaha satékah polah ngaronjatkeun produksi burayak lauk rupa-rupa jenis lauk, pikeun nyumponan pangabutuh para patani lauk, boh di jero boh di luar Kota Sukabumi. Anapon upaya anu dipilampah pikeun ngahontal targét produksi rupa-rupa jenis burayak lauk téh, diantarana ku cara ngoméan jeung ngawangun balong lauk anyar, sarta ngaronjatkeun rupa-rupa fasilitas, prasarana jeung sarana pangrojong séjénna.

Leave a Reply