KACAMATAN CITAMIANG MEUNANG LAYANG PANGAJÉN ZONA INTEGRITAS NUJU WBK JEUNG WBBM TAUN 2018

Reporter / Ěditor : ENDANG SUMARDI

Pamaréntah Kota Sukabumi ngaliwatan Kacamatan Citamiang meunang deui Layang Pangajén Zona Integritas nuju WBK (Wilayah Bebas tina Koropsi) jeung WBBM (Wilayah Birokrasi Bersih jeung Melayani) Taun 2018, ti KemenPAN-RB (Kementrian Pandayagunaan Aparatur Nagara jeung Réformasi Birokrasi) RI. Ěta layang pangajén téh dipasrahkeun ku MenPAN-RB (Mentri Pandayagunaan Aparatur Nagara jeung Réformasi Birokrasi) RI, Syarifuddin, ka Wakil Wali Kota Sukabumi, H. Andri S. Hamami, S.H., M.H., cindekna tanggal 10 Désémber 2018, di Golden Ballroom The Sultan Jakarta, dibarengan ku Camat Citamiang, Fitrya Kusnaningsih, S.STP., katut pajabat séjénna, nya éta Asistén Pamaréntahan Setda Kota Sukabumi, Drs. H. Andri Setiawan, M.M., sarta Kapala Bagian Ortala (Organisasi jeung Tata Laksana) Setda Kota Sukabumi, Diar Ruswidjanarko, ATD., M.Ěng.M.

Anapon acara pamasrahan éta layang pangajén téh, dibuka sacara resmi ku Wakil Persidén RI, Jusuf Kalla. Sedengkeun indikator anu diajén pikeun meunang éta layang pangajén téh, ngawengku palayanan publik, management parobahan internal, komitmen pingpinan jeung sakumna réngréngannana, integritas dina méré palayanan, sarta inovasi katut strategi paningkatan palayanan publik jeung SAKIP (Sistim Akuntabilitas Kinerja Instansi Pamaréntah).

Sakumaha anu dijelaskeun ku Wakil Wali Kota Sukabumi, H. Andri S. Hamami, S.H., M.H., Kacamatan Citamiang nyumponan sakumna indikator anu diajén, malah ajénna luhur pisan sarta jadi kategori pang hadéna jeung jadi pacontohan di Kota Sukabumi, anu pamustungannana meunang éta layang pangajén. Salian ti éta,  Wakil Wali Kota Sukabumi ngahaturkeun nuhun sarta ngucap sukur ku hasilna Kacamatan Citamiang meunang éta layang pangajén téh.

Tah ku lantaran kitu, Wakil Wali Kota Sukabumi kalayan asmana Kapala Daérah katut Pamaréntah Kota Sukabumi, ngahaturkeun nuhun sarta layang pangajén anu saluhur-luhurna ka Camat Citamiang katut sakumna réngréngannana, anu geus usaha satékah polah ngalaksanakeun pancén gawé jeung pangabdian, hususna dina méré palayanan anu sahadé-hadéna ka masarakat, anu ahirna meunang éta layang pangajén.

Disagigireun ti éta, Wakil Wali Kota Sukabumi nandeskeun, sakumna SKPD (Satuan Kerja Parangkat Daérah) wajib nerapkeun éta program, sarta baris dipilih jeung diajén ku KemenPAN-RB RI, pikeun meunang éta layang pangajén. Salajuna Wakil Wali Kota Sukabumi ngaharepkeun, éta layang pangajén téh bisa mecut sumanget ka sakumna SKPD hususna Kacamatan Citamiang, pikeun terus méré palayanan anu leuwih hadé deui ka masarakat. Wakil Wali Kota Sukabumi ngaharepkeun, ka hareup lain ukur Kacamatan Citamiang wungkul anu meunang éta layang pangajén téh, tapi sakumna kacamatan di Kota Sukabumi bisa meunang éta layang pangajén.

Leave a Reply