TAPPING BOX JEUNG APLIKASI PANTAS GEUS DILAUNCHING

Reporter / Ěditor : ENDANG SUMARDI

Tapping Box atawa Mesin Panyatet Transaksi jeung Aplikasi Pantas (Pajeg Online Kota Sukabumi), geus dilaunching sacara resmi ku Wakil Wali Kota Sukabumi, H. Andri S. Hamami, S.H., M.H., sakaligus Sosialisasi GNNT (Gerakkan Nasional Non Tunéy) sarta Cikur (Ciri-ciri Kaaslian Uang Rupia) jeung Kawajiban Ngagunakeun Rupia, cindekna di Citymall Sukabumi, anyar-anyar ieu. Anapon nu hadir dina kasempetan éta, Ketua DPRD Kota Sukabumi, Yunus Suhandi, S.IP., PLT (Palaksana Tugas) Asistén Paékonomian jeung Pangwangunan Setda Kota Sukabumi, Drs. H. Kostaman, M.M., Kapala BPKD (Badan Pangalolaan Kauangan Daérah) Kota Sukabumi, Drs. H. Dida Sembada, M.M., Pawakilan Bank Indonésia Provinsi Jawa Barat, Kapala Bank BJB Cabang Sukabumi, pawakilan ti sakumna bank nu aya di Kota Sukabumi, sarta para tamu ondangan lainna.

Dina kasempetan éta, Wakil Wali Kota Sukabumi kalayan asmana Kapala Daérah jeung Pamaréntah Kota Sukabumi, ngahaturkeun nuhun jeung pangajén anu saluhur-luhurna, ku dilaksanakeunnana éta acara anu dicalagarakeun ku Pawakilan Bank Indonésia Provinsi Jawa Barat jeung Bank BJB Cabang Sukabumi, anu ngangkat tagline Sukabumi Mapag Rupia Mantep, sarta Sosialisasi Cikur, Sosialisasi Panyaluran Bantuan Sosial Non Tunéy jeung Nukeurkeun Duit anu Teu Layak Ědar sarta duit anu dicabut jeung ditarik tina parédaran, pikeun masarakat jeung bank nu aya di Kota Sukabumi.

Salajuna Wakil Wali Kota Sukabumi umajak ka sakumna lapisan masarakat sarta para padagang jeung pangusaha, sangkan ngagunakeun transaksi non tunéy dina satiap pamayaran transaksi, lantaran bisa ngababarikeun jeung ngagancangkeun sarta aman jeung éfisién, anu pamustungannana bisa ngabentuk kabiasaan pikeun ngalaksanakeun transaksi sacara non tunéy. Salian ti éta ogé bisa ngaronjatkeun aksés masarakat ka lembaga kauangan, sarta bisa ngurangan parédaran jeung pangalolaan uang tunéy jeung neken poténsi kabocoran sarta panyalahgunaan jeung kajahatan. Disagigireun ti éta ogé dijelaskeun, Pamaréntah Kota Sukabumi geus ngalaksanakeun transaksi non tunéy dina pangalolaan kauangan ti bulan Novémber 2017 anu geus kaliwat. Sala sahijina dina hal palaporan, pangitungan jeung pamayaran pajeg ngaliwatan Aplikasi Pantas.

Nyigeung Tapping Box, sakumaha anu dicaritakeun ku Wakil Wali Kota Sukabumi, salian ti pikeun ngaronjatkeun kasadaran para wajib pajeg, ogé pikeun ngagampangkeun para wajib pajeg dina nyieun laporan omzét jeung ngitung gedéna pajeg, sarta pikeun ngaronjatkeun akurasi data panarimaan pamayaran pajeg, sakaligus pikeun neken kabocoran PAD (Pandapatan Asli Daérah) Kota Sukabumi, hususna tina séktor pajeg.

Leave a Reply