PAMARÉNTAH KOTA SUKABUMI BARIS NYALAGARAKEUN SELÉKSI PIKEUN SEKERTARIS DAÉRAH

Reporter / Editor : ENDANG SUMARDI

Pamaréntah Kota Sukabumi, nurutkeun rarancang dina waktu deukeut baris nyalagarakeun seléksi sacara nembrak pikeun Sekertaris Daérah jeung 4 Pajabat Ěsélon 2 di lingkungan Pamaréntah Kota Sukabumi, anu ngawengku Asistén Paékonomian jeung Pangwangunan, Kapala Disdalduk, KB, P3A jeung PM (Dines Pangadalian Padumuk, Kulawarga Berencana, Pangbardayaan Perempuan, Palindungan Anak jeung Pangbardayaan Masarakat), sarta Kapala Dines Sosial jeung Kapala Dines Tanaga Kerja.

Lantaran sakumaha anu diungkabkeun ku Wali Kota Sukabumi, H. Achmad Fahmi, Pamaréntah Kota Sukabumi geus meunang rékoméndasi ti Kemendagri (Kementrian Dalem Negri) jeung pasatujuan ti Gubernur Jawa Barat. Salian ti éta, Pamaréntah Kota Sukabumi geus nyebarkeun pangumuman seléksi sacara nembrak ka satiap OPD (Organisasi Parangkat Daérah) di lingkungan Pamaréntah Kota Sukabumi. Maksud jeung tujuannana, supaya para pajabat anu ngabogaan hasrat miluan kana éta seléksi téh bisa sagancangna ngadaftar, lantaran éta seléksi sacara nembrak téh diharepkeun bisa sagancangna dilaksanakeun.

Tah pikeun ngarojong kana kalancaran palaksanaan éta seléksi sacara nembrak téh, Tim Seléksi Pamaréntah Kota Sukabumi keur ngarumuskeun tahapan seléksi, luyu jeung paraturan katut undang-undang anu ditetepkeun, sarta arahan ti Kemendagri jeung Gubernur Jawa Barat. Sabab pangeusian kakosongan Sekertaris Daérah jeung 4 Pajabat Ěsélon 2 téh kudu sagancangna dieusi, supaya palayanan anu jadi tugas Sekertaris Daérah jeung 4 Pajabat Ěsélon 2 téh bisa leuwih maksimal deui.

Wali Kota Sukabumi nandeskeun, sok sanajan jabatannana sabagé Kapala Daérah can nepi 6 bulan, tapi saupama meunang rékoméndasi ti Kemendagri jeung pasatujuan ti Gubernur mah, bisa ngalaksanakeun seléksi jeung ngistrénan para pajabat. Lantaran saupama jabatannana sabagé Kapala Daérah geus nepi 6 bulan mah, teu kudu meunang rékoméndasi ti Kemendagri jeung pasatujuan ti Gubernur.

Salajuna ditandeskeun, dilaksanakeunnana seléksi sacara nembrak pikeun Sekertaris Daérah jeung 4 Pajabat Ěsélon 2 téh, sabagé sala sahiji upaya pikeun ngahasilkeun Sekertaris Daérah katut 4 Pajabat Ěsélon 2 anu leuwih hadé jeung leuwih profésional deui. Komo deui pikeun Sekertaris Daérah mah, salian ti kudu profésional téh ogé kudu jadi tuladan sarta kudu jadi pamingpin pikeun sakumna ASN (Aparatur Sipil Nagara). Disagigireun ti éta, ogé kudu ngabogaan kamampuhan manajerial jeung kamampuhan ngajawab rupa-rupa tangtangan pamaréntahan.

Leave a Reply