GAWÉ BARENG NGEUNAAN PANYALAGARAAN URUSAN PERPUSTAKAAN

Reporter / Editor : ENDANG SUMARDI

Pamaréntah Provinsi Jawa Barat nyalagarakeun MoU (Mémorandum of Understanding) atawa nota kasapahaman gawé bareng jeung Pamaréntah Kabupatén katut Kota sa Jawa Barat, ngeunaan Panyalagaraan Urusan Perpustakaan, dina acara Launching Program Kolecer (Kotak Literasi Warga Cerdas) jeung Candil (Maca Dina Library), cindekna di Taman Sempur Kota Bogor, sawatara poé ka tukang. Sedengkeun nota kasapahaman gawé bareng antara Pamaréntah Provinsi Jawa Barat jeung Pamaréntah Kota Sukabumi, ditandatangan ku Wali Kota Sukabumi, H. Achmad Fahmi, dibarengan ku Bunda Literasi Kota Sukabumi, Hj. Fitri Hayati Fahmi, Kapala Dispusip (Dines Perpustakaan jeung Kaarsipan) Kota Sukabumi, Nicke Siti Rahayu, S.H., M.H., sarta Kapala Bagian Paékonomian, Pangwangunan jeung Gawé Bareng Daérah Setda Kota Sukabumi, Rahmat Sukandar, S.Si., M.T., M.Sc.

Dina kasempetan éta, Gubernur Jawa Barat, Ridwan Kamil ngajelaskeun, Kolecer téh ngarupakan street library, nya éta sala sahiji inovasi perpustakaan mini, anu kainspirasi tina kotak telepon di nagara Inggris anu ngamuat 80 buku. Anapon maksud jeung tujuan tina Kolecer téh, nya éta sabagé sala sahiji wadah pikeun masarakat Jawa Barat, anu sulit ngaaksés ka Perpustakaan Umum. Sedengkeun Candil ngarupakan aplikasi é-library anu ngabogaan basis android milik Pamasréntah Jawa Barat, anu eusina buku dina bentuk éléktronik ti para pangarang, diantarana Ridwan Kamil. Andy F. Noya jeung pangarang lainna anu asalna ti Jawa Barat jeung nasional. Salajuna dijelaskeun, dicalagarakeunnana MoU antara Pamaréntah Provinsi Jawa Barat jeung Pamaréntah Kabupaten katut Kota sa Jawa Barat, ngeunaan Panyalagaraan Urusan Perpustakaan téh, sabagé sala sahiji upaya pikeun ngaronjatkeun minat jeung resep sarta budaya baca masarakat Jawa Barat, pikeun ngaronjatkeun ajén SDM (Sumber Daya Manusa) Jawa Barat sarta ngawangun sakaligus ngawujudkeun Jawa Barat Juara Lahir jeung Batin.

Sedengkeun Wali Kota Sukabumi, H. Achmad Fahmi ngajelaskeun, dilaksanakeunnana MoU antara Pamaréntah Provinsi Jawa Barat jeung Pamaréntah Kabupatén katut Kota sa Jawa Barat, ngeunaan Panyalagaraan Urusan Perpustakaan téh, ngarupakeun sumangat babarengan pikeun ngaronjatkeun budaya literasi jeung budaya baca, pikeun ngaronjatkeun kacerdasan jeung ajén SDM Jawa Barat. Salian ti éta ogé dijelaskeun, Pamaréntah Kota Sukabumi baris salawasna usaha satékah polah ngarojong jeung ngalaksanakeun Program Kolecer jeung Candil Pamaréntah Provinsi Jawa Barat, pikeun ngaronjatkeun ajén SDM Kota Sukabumi, supaya jadi bangsa anu pinter jeung cerdas, ngaliwatan maca jeung literasi.

Leave a Reply