SALA SAHIJI INSTRUMÉN WARAGAD PIKEUN PANGWANGUNAN NYA ĚTA TINA CUKÉ BAKO

Reporter / Editor : ENDANG SUMARDI

Wakil Wali Kota Sukabumi, H. Andri S. Hamami, S.H., M.H. nandeskeun, sala sahiji instrumén waragad pikeun pangwangunan anu digambarkeun dina APBN (Anggaran Pandpatan jeung Balanja Nagara) jeung APBD (Anggaran Pandapatan jeung Balanja Daérah), nya éta tina Cuké Bako gedéna sakira 2 peresén, anu dibagikeun ka sakumna provinsi sarta kabupatén jeung kota sa Indonésia, dina bentuk DBHCTB (Dana Bagi Hasil Cuké Hasil Bako). Ěta panandesan Wakil Wali Kota Sukabumi téh, ditepikeun dina biantara basa muka sacara resmi Sosialisasi Katangtuan dina Widang Cuké Taun 2018, cindekna di Ballroom Hotél Anugrah Kota Sukabumi, anyar-anyar ieu. Anapon pamilon anu miluan éta sosialisasi téh, nya éta para Camat jeung Lurah, Inohong Masarakat, Inohong Pamuda jeung pawakilan Padagang, kalayan nu jadi nara sumberna nya éta Kapala Dines Sat Pol PP Pol PP (Satuan Polisi Pamong Praja) Kota Sukabumi, Yadi Mulyadi, S.STP., M.Si., sarta ti Kantor Pangawasan jeung Palayanan Béa jeung Cuké Bogor.

Salian ti éta Wakil Wali Kota Sukabumi nandeskeun, saupama niténan DBHCHT dina kontéks anggaran, tangtu kacida penting jeung strategisna, lantaran nyangkut jumlah duit anu teu saeutik, sarta bisa digunakeun pikeun ngawaragadan pangwangunan. Ngan tina sisi kaséhatan kacida dilemana pikeun pamaréntah. Sabab roko téh ngarupakeun sala sahiji ancaman jeung kacida ngabahayakeunnana pikeun kaséhatan satiap individu masarakat. Sedengkeun tina sisi produsén industri rook, pamaréntah teu bisa ngalaksanakeun panutupan, lantaran baris gedé pangaruhna kana ngaronjatna jumlah pangangguran sacara masif, boh di lével buruh pabrik roko boh di kalangan patani Bako. Kitu deui tina sisi konsumén, pamaréntah teu mungkin ngalarang sacara absolut supaya teu ngaroko, sabab ngarupakeun hak asasi satiap individu masarakat.

Tah pikeun ngungkulan éta hal téh, nurutkeun Wakil Wali Kota Sukabumi diperlukeun ayana hiji kawijakan anu sifatna win-win solution pikeun sakumna pihak, diantarana ngaronjatkeun cuké roko, ngaleungitkeun roko ilégal jeung pita palsu, ngawatesanan kadar nikotin jeung tar, sarta ngawatesanan rohang gerak masarakat anu nyandu ngaroko, supaya teu ngaroko di satiap KTR (Kawasan Tanpa Roko) jeung di satiap rohang publik. Salajuna ditandeskeun, pikeun Kota Sukabumi geus diterbitkeun jeung diterapkeun Perda (Peraturan Daérah) Kota Sukabumi Nomer 3 Taun 2014 ngeunaan KTR. Disagigireun ti éta, ogé kudu aya usaha anu sistematis dina ngagunakeun DBHCHT, nya éta pikeun ngoméan sakaligus ngaronjatkeun ajén kaséhatan masarakat jeung lingkungan.

Leave a Reply