PAMARÉNTAH KOTA SUKABUMI MEUNANG DEUI APĚ TAUN 2018

Reporter / Ěditor : ENDANG SUMARDI

Pamaréntah Kota Sukabumi, meunang deui APĚ (Anugrah Parahita Ěkapraya) Taun 2018 ti Pamaréntah Puseur. Ěta anugrah téh dipasrahkeun ku Mentri PPPA (Pangbardayaan Perempuan jeung Palindungan Anak) RI, Yohana Yémbisé, ka Wali Kota Sukabumi, H. Achmad Fahmi, katut 9 Kamentrian jeung Lembaga, 22 Pamaréntah Provinsi sarta 158 Pamaréntah Kabupatén jeung Kota séjénna sa Indonésia, cindekna tanggal 19 Désémber 2018, di Istana Wakil Persidén Jakarta. Sedengkeun éta acara pamasrahan anugrah  téh, dibuka sacara resmi ku Wakil Persidén RI, Jusuf Kalla.

Saréngséna narima éta anugrah téh, Wali Kota Sukabumi, H. Achmad Fahmi dibarengan ku PLT (Palaksana Tugas) Kapala Disdalduk/ KB/ P3A jeung PM (Dines Pangadalian Padumuk, Kulawarga Berencana, Pangbardayaan Perempuan, Palindungan Anak jeung Pangbardayaan Masarakat) Kota Sukabumi, Nicke Siti Rahayu, S.H., M.H. ngajelaskeun, éta anugrah téh ngarupakeun bentuk aprésiasi ti Pamaréntah Puseur, kana komitmen katut peran Kamentrian jeung Lembaga, Pamaréntah Provinsi sarta Pamaréntah Kabupatén jeung Kota di Indonésia, anu geus usaha satékah polah ngalaksanakeun pangwangunan PPPA ngaliwatan strategi PUG (Pang-arus-Utamaan Génder).

Salian ti éta, Wali Kota Sukabumi ngahaturkeun nuhun katut pangajén anu saluhur-luhurna ka sakumna pihak hususna ka sakumna SKPD (Satuan Kerja Parangkat Daérah) katut instansi jeung lembaga nu aya kaitannana di Kota Sukabumi, anu geus usaha satékah polah ngalaksanakeun pangwangunan PPPA ngaliwatan strategi PUG, anu pamustungannana Kota Sukabumi meunang deui APĚ ti Pamaréntah Puseur.

Salajuna dijelaskeun, éta anugrah téh ngarupakeun sala sahiji wujud nyata pangakuan jeung aprésiasi ti Pamaréntah Puseur, ka Pamaréntah Kota Sukabumi jeung sakumna SKPD katut instansi jeung lembaga nu aya kaitannana di Kota Sukabumi, anu salawasna usaha satékah polah ngalaksanakeun rupa-rupa torobosan dina ngawujudkeun kasataraan génder, sakaligus ngadorong ilu biung kaom wanoja jeung palindungan hak-hak anak di Kota Sukabumi.

Leuwih jauh Wali Kota Sukabumi ngajelaskeun, dina taun saméméhna Pamaréntah Kota Sukabumi ogé meunang anugrah anu sarua ti Pamaréntah Puseur, anu prédikatna Madya. Sedengkeun dina taun 2018, naék kelas jadi prédikat Utama. Tah ku lantaran kitu, Wali Kota Sukabumi ngaharepkeun, ku meunangna éta anugrah téh, bisa mecut jeung ngahudangkeun sumanget kinerja sakumna pihak hususna Pamaréntah Kota Sukabumi jeung sakumna SKPD katut instansi jeung lembaga nu aya kaitannana di Kota Sukabumi, dina ngadorong kasataraan génder, palindungan wanoja jeung nyumponan hak-hak anak.

Leave a Reply