PAMARÉNTAH KOTA SUKABUMI MEUNANG HIBAH BRT

Reporter / Ěditor : ENDANG SUMARDI

Pamaréntah Kota Sukabumi katut Pamaréntah Kota Bandung, Kota Bekasi, Kota Cirebon, Kabupatén Cirebon jeung Kabupatén Indramayu, meunang hibah BRT (Beus Rapid Transit) ti Kamentrian Pahubungan RI. Anapon éta hibah Beus téh sagemblengna aya 50 unit, sarta Pamaréntah Kota Sukabumi meunang 5 unit. Ěta hibah Beus téh, dipasrahkeun ku Gubernur Jawa Barat, Ridwan Kamil, ka PLT (Palaksana Tugas) Sekertaris Daérah Kota Sukabumi, Drs. H. Saléh Makbullah, M.Si., dibarengan ku Kapala Dines Pahubungan Kota Sukabumi, Abdul Rachman, A.TD., saréngséna Upacara Miéling Poé Béla Nagara, Poé Kasatiakawanan Sosial Nasional jeung Poé Nusantara Taun 2018 Tingkat Jawa Barat, di Buruan Gedong Saté Provinsi Jawa Barat, sawatara poé ka tukang.

Salian ti éta, Gubernur Jawa Barat ogé masrahkan hibah 17 unit Beus Sakola ka Pamaréntah Kota Banjar, Kabupatén Garut, Kabuptén Ciamis, Kabupatén Pangandaran, Kabupatén Kuningan jeung Kabupatén Indramayu, sarta ka UPI (Universitas Pendidikan Indonésia), ogé ti Kamentrian Pahubungan RI. Dina kasempetan éta, Gubernur Jawa Barat ngajelaskeun, BRT téh ngarupakeun moda transportasi masal anu mibanda desain palayanan husus kalayan ongkosna kadongkang ku sakumna lapisan masarakat, sarta sistim pamayarannana dilaksanakeun di Halteu Beus. Disagigireun ti éta, BRT téh ngabogaan Jalur Husus, Halteu jeung Sistim Informasi Husus pikeun para panumpang. Gubernur Jawa Barat ngaharepkeun, ku ayana éta hibah Beus téh, bisa jadi solusi sakaligus ngungkulan masalah kapadetan patali marga jeung polusi udara di pakotaan.

 

Leave a Reply