DISDUKCAPIL KOTA SUKABUMI KEUR NGAHANGKEUTKEUN PANERBITAN KIA

Reporter/Redaktur/Ěditor : ENDANG SUMARDI

Disdukcapil (Dines Kapadumukan jeung Panyatetan Sipil) Kota Sukabumi, dina danget ieu keur usaha satékah polah ngahangkeutkeun panerbitan KIA (Kartuh Idéntitas Anak), pikeun sakumna anak di Kota Sukabumi, umur 5 taun ka handap nepi ka umur 17 taun kurang sapoé. Malah pikeun satiap anak anu boga KIA, bisa meunang diskon atawa potongan harga di sajumlah tempat pabalanjaan jeung tempat ulin di Kota Sukabumi. Sakumaha anu dijelaskeun ku Kapala Disdukcapil Kota Sukabumi, Iskandar, S.IP., M.T., diskon di sajumlah tempat pabalanjaan jeung tempat ulin di Kota Sukabumi pikeun satiap anak anu ngabogaan KIA téh, ngarupakeun sala sahiji usaha jeung torobosan Disdukcapil Kota Sukabumi, pikeun ngarojong kalancaran dina ngalaksanakeun panerbitan KIA di Kota Sukabumi.

Salajuna dijelaskeun, nepi ka danget ieu geus aya 7 mitra Disdukcapil Kota Sukabumi, anu baris méré diskon ka satiap anak anu ngabogaan KIA. Nya éta Hotél Maxoné, SantaSéa Waterpark, Rumah Séafood, Restoran Mc. Donald’s Indonésia, Kolam Renang Hotél Taman Sari, Taman Rékreasi Kolam Renang jeung Olah Raga Kenari, sarta Rumah Makan Kedéy 79. Lian ti éta ogé dijelaskeun, ka hareup Disdukcapil Kota Sukabumi baris nambah mitra, pikeun méré diskon ka satiap anak anu ngabogaan KIA. Tah ku éta hal téh, fungsi KIA téh lain ukur ngrupakeun idéntitas pikeun satiap anak wungkul, tapi ngabogaan mangpaat pikeun nu séjénna.

Nyigeung jumlah KIA anu geus diterbitkeun nepi ka danget ieu, nurutkeun Kapala Disdukcapil Kota Sukabumi kakara ngahontal 550 kartuh, luyu jeung usulan ti sakola. Tah ku sabab kitu, pihakna katut sakumna réngréngannana baris usaha satékah polah ngahangkeutkeun panerbitan KIA, supaya sakumna anak di Kota Sukabumi ngabogaan KIA.

Anapon maksud jeung tujuan diterbitkeunnana KIA téh, luyu jeung Pasal 2 Permendagri (Peraturan Mentri Dalem Negri) Nomer 2 Taun 2016, pikeun ngaronjatkeun pandataan, palindungan jeung palayanan publik, sarta sabagé sala sahiji upaya pikeun méré palindungan jeung nyumponan hak konstitusional warga nagara. Saterusna dijelaskeun, KIA téh ngarupakeun idéntitas resmi jeung bukti diri anak anu umurna kurang ti 17 taun jeung acan nikah.

Disagigireun ti éta ogé dijelaskeun, pikeun anak anu anyar lahir, KIA-na baris diterbitkeun bareng jeung panerbitan Akteu Kalahirannana. Sedengkeun pikeun anak anu umurna can nepi 5 taun nepi ka umur kurang ti 17 taun tapi can ngabogaan KIA, kudu diajukeun ka Disdukcapil Kota Sukabumi, sarta kudu ngalampirkeun foto copy jeung nunjukkeun Kutipan Akteu Kalahiran Aslina, katut KK (Kartuh Kulawarga) Asli Kolotna jeung KTP (Kartuh Tanda Padumuk) Asli Indung-Bapana.

Leave a Reply