WALI KOTA SUKABUMI NITÉNAN KASIAPAN LAHAN URUT TERMINAL SUDIRMAN

Reporter/Redaktur/Ěditor : ENDANG SUMARDI

Wali Kota Sukabumi, H. Achmad Fahmi dibarengan ku Wakil Wali Kota Sukabumi, H. Andri S. Hamami, S.H., M.H., PLT (Palaksana Tugas) Sekertaris Daérah Kota Sukabumi, Drs. H. Saléh Makbullah, M.Si. katut Kapala OPD (Organisasi Parangkat Daérah) nu aya kaitannana, ngadongdon sakaligus niténan kasiapan lahan urut Terminal Sudirman Kota Sukabumi, cindeka tanggal 2 Januari 2019, anu baris dijadikan tempat panampungan sementara pikeun para padagang anu jualan di sabudeureun pangwangunan Pasar Tradisional Semi Modéren Kota Sukabumi, anu lokasina dina urut Pasar Pelita Kota Sukabumi.

Dina kasempetan éta Wali Kota Sukabumi ngajelaskeun, maksud jeung tujuan dilaksanakeunnana dongdonan ieu téh, na éta pikeun niténan sakaligus ngecék kaayaan lahan urut Terminal Sudirman, kaasup rupa-rupa kakurangannana pikeun sagancangna dilengkepan. Salian ti éta ogé dijelaskeun, Pamaréntah Kota Sukabumi geus ngawangun kurang leuwih 500 kios di lahan urut Terminal Sudirman, pikeun nampung para padagang anu jualan di sabudeureun Pasar Tradisional Semi Modéren. Maksud jeung tujuannana, nya éta pikeun ngarojong kalancaran pangwangunan éta pasar. Lantaran Pamaréntah Kota Sukabumi nargétkeun, pangwangunan Pasar Tradisional Semi Modéren Kota Sukabumi téh bisa réngsé dina seméster dua taun 2019.

Salajuna dijelaskeun, pamindahan sementara pikeun éta para padagang téh, nya éta pikeun ngajamin kasalametan sarta kaamanan jeung kaayeman ka éta para padagang jeung masarakat anu baralanja. Lian ti éta, ogé pikeun ngagampangkeun jeung ngagancangkeun aksés asup kandaraan beurat ka lahan pangwangunan éta pasar. Leuwih jauh Wali Kota Sukabumi ngajelaskeun, panampungan sementara pikeun para padagang ka lahan urut Terminal Sudirman téh, direncanakeun lilana kurang leuwih sataun, nepi ka réngsé pangwangunan Pasar Tradisional Semi Modéren Kota Sukabumi.

Disagigireun ti éta, Wali Kota Sukabumi ngaharepkeun, pamindahan para padagang ti sabudeureun Pasar Tradisional Semi Modéren Kota Sukabumi ka lahan urut Terminal Sudirman Kota Sukabumi téh bisa sagancangna dilaksanakeun, supaya prosés pangwangunan Pasar Tradisional Semi Modéren Kota Sukabumi téh bisa lumangsung hadé jeung lancar, sarta bisa réngsé dina seméster dua taun 2019, luyu jeung anu ditargétkeun ku Pamaréntah Kota Sukabumi.

Leave a Reply