WAKIL WALI KOTA SUKABUMI NGADONGDON OBYÉK WISATA PAMANDIAN CAI PANAS CIKUNDUL


Reporter/Redaktur/Editor : ENDANG SUMARDI

Wakil Wali Kota Sukabumi, H. Andri S. Hamami, S.H., M.H. katut Wakil Ketua TP PKK Kota Sukabumi, Ěva Siti Rahmatillah, ngadongdon sakaligus niténan jeung ngabandingkeun fasilitas Obyék Wisata Pamandian Cai Panas Cikundul, cindekna di wewengkon Kalurahan Cikundul, Kacamatan Lembursitu, Kota Sukabumi, tanggal 20 Januari 2019. Dina kasempetan éta, Wakil Wali Kota Sukabumi ngajelaskeun, di Obyék Wisata PamandianCai Panas Cikundul milik Pamaréntah Kota Sukabumi jeung Swasta 3G téh, ogé dimekarkeun Pasar Digital Cikundul anu kacida unikna, anu pamustungannana jadi daya pikat jeung daya tarik pikeun para wisatawan, boh ti jero boh ti luar Kota Sukabumi, pikeun salawasna ngadongdon ieu obyék wisata.

Saterusna dijelaskeun, di Obyék Wisata Pamandian Cai Panas Cikundul téh, aya sababaraha hal anu kudu dioméan jeung dimekarkeun, kaasup Pasar Digital Cikundul. Ku sabab kitu, Pamaréntah Kota Sukabumi baris nyobaan ngamangpaatkeun bantuan dana CSR, pikeun ngaronjatkeun jeung ngamekarkeun Obyék Wisata Pamandian Cai Panas Cikundul jeung Pasar Digital Cikundul.

Salian ti éta, Wakil Wali Kota Sukabumi ngajelaskeun kacida ngaaprésiasi Pasar Digital Cikundul anu dilahirkeun GenPi (Generasi Pesona Indonésia) Kota Sukabumi, anu salawasna konsistén ngajaga éksisténsi sakaligus ngaronjatkeun jeung ngamekarkeun Pasar Digital Cikundul. Ku lantaran kitu, Wakil Wali Kota Sukabumi ngaharepkeun, ku ayana gawé bareng ieu, Obyék Wisata Pamandian Cai Panas Cikundul jeung Pasar Digital Cikundul téh, ka hareupna bisa terus ngaronjat jeung mekar sarta bisa leuwih hadé deui.

Sedengkeun Kapala Widang Pariwisata Disporapar (Dines Kapamudaan, Olahraga jeung Pariwisata) Kota Sukabumi, Ir. Yudi Yustiawan, S.T., M.T. ngajelaskeun, Pamaréntah Kota Sukabumi salawasana usaha satékah polah ngabebenah sakaligus ngaronjatkeun jeung ngamekarkeun Obyék Wisata Pamandian Cai Panas Cikundul. Diantarana ku cara ngalengkepan rupa-rupa fasilitas pangrojong, pikeun nyugemakeun para pangunjung anu datang ka ieu obyék wisata.

Kapala Widang Pariwisata Disporapar Kota Sukabumi ngaharepkeun, ku éta usaha téh bisa narik para pangunjung saréa-réana ka ieu obyék wisata, boh ti jero boh ti luar Kota Sukabumi. supaya bisa ngaronjatkeun pandapatan jeung kasajahtraan masarakat hususna para padagang di kawasan ieu obyék wisata, sarta PAD (Pandapatan Asli Daérah) Kota Sukabumi tina séktor pariwisata.

Leave a Reply