SAJUMLAH 17 WARGA BINAAN LAPAS KELAS II B NYOMPLONG GEUS MEUNANG KTP-ÉL


Reporter/Redaktur/Editor : ENDANG SUMARDI

Sajumlah 17 warga binaan Lapas (Lembaga Pamasarakatan) Kelas II B Nyomplong Kota Sukabumi, geus meunang KTP-él (Kartuh Tanda Padumuk éléktronik) sacara langsung ti Disdukcapih (Dines Kapadumukan jeung Panyatetan Sipil) Kota Sukabumi, ngaliwatan program si Jempol (Inovasi Jemput Bola) Palayanan Nyieun Dokumén jeung Adminduk (Administrasi Kapadumukan) Disdukcapil  Kota Sukabumi. Ěta program anu sacara bareng dilaksanakeun di 522 Lapas jeung Rutan (Rumah Tahanan) sa Indonésia téh, dititénan langsung ku Wali Kota Sukabumi, H. Achmad Fahmi, cindekna tanggal 17 Januari 2019, anyar-anyar ieu.

Dina kasempetan éta, Wali Kota Sukabumi ngahaturkeun nuhun katut layang pangajén anu saluhur-luhurna ka Kapala Disdukcapil Kota Sukabumi katut sakumna réngréngannana, anu geus nyalagarakeun program si Jempol Palayanan Nyieun Dokumén jeung Adminduk di Lapas Kelas II B Nyomplong Kota Sukabumi. Lantaran éta program téh luyu jeung arahan ti Kemenkumham (Kementrian Hukum jeung Hak Azasi Manusa) sarta Kemendagri (Kementrian Dalem Negri), anu dilaksanakeun sacara bareng di satiap Lapas jeung Rutan di Indonésia.

Maksud jeung tujuannana pikeun mastikeun sakumna warga binaan di satiap Lapas jeung Rutan ngabogaan idéntitas hususna KTP-él jeung KK (Kartuh Kulawarga), sabagé sala sahiji upaya pamaréntah pikeun nyukséskeun Pamilu (Pamilihan Umum) Bareng Taun 2019. Salajuna diharepkeun, ku dilaksanakeunnana éta téh, sakumna warga binaan di Lapas Kelas II B Nyomplong Kota Sukabumi bisa nyalurkeun hak jeung aspirasina dina Pamilu Bareng Taun 2019.

Sedengkeun Kapala Disdukcapil Kota Sukabumi, Iskandar, S.IP., M.T. ngajelaskeun, éta program téh dilaksanakeun luyu jeung anjuran Kemenkumham jeung Kemendagri. Anapon maksud jeung tujuan dilaksanakeunnana éta program téh, salian pikeun ngaronjatkeun palayanan jeung nyumponan idéntitas kapadumukan warga binaan, ogé pikeun nyumponan pasaratan para warga binaan di Lapas Kelas II B Nyomplong Kota Sukabumi dina milu Pamilu Bareng Taun 2019. Saterusna dijelaskeun, dina éta program téh aya 93 urang warga binaan Lapas Kelas II B Nyomplong Kota Sukabumi, anu ngalaksanakeun parékaman biométrik Dokumén jeung Adminduk. Tina éta jumlah téh, sajumlah 22 urang warga Kota Sukabumi, jeung sajumlah 71 urang warga ti luar Kota Sukabumi. Sabab pikeun parékaman biométrik Dokumén jeung Adminduk téh, bisa diiluan ku warga ti mana waé. Ngan pikeun nyitak Dokumén jeung Adminduk-na mah kudu dilaksanakeun ku Disdukcapil daérah warga binaan masing-masing.

Leave a Reply