MUKA KASEMPETAN KA PARA PROFÉSIONAL PIKEUN NGEUSI JABATAN DIRÉKTUR PDAM TBW

Reporter/Redaktur/Editor : ENDANG SUMARDI

Pamaréntah Kota Sukabumi muka kasempetan ka para profésional, pikeun ngeusi jabatan Diréktur PDAM TBW (Pausahaan Daérah Air Minum Tirta Bumi Wibawa) Kota Sukabumi mangsa jabatan taun 2019-2023, luyu jeung katangtuan Paraturan Pamaréntah Nomer 54 Taun 2017 ngeunaan BUMD (Badan Usaha Milik Daérah), Paraturan Mentri Dalem Negri Nomer 37 Taun 2018 ngeunaan Pangangkatan jeung Ngeureunkeun Anggota Déwan Pangawas atawa Anggota Komisaris jeung Anggota Diréksi BUMD, sarta Paraturan Daérah Kota Sukabumi Nomer 3 Taun 2009 ngeunaan PDAM TBW Kota Sukabumi.

PLT (Palaksana Tugas) Sekertaris Daérah Kota Sukabumi, Drs. H. Saléh Makbullah, M.Si. salaku Ketua Panitia Seléksi Jabatan Diréktur PDAM TBW Kota Sukabumi mangsa jabatan taun 2019-2023 ngajelaskeun, pikeun para profésional anu minat ngeusi jabatan Diréktur PDAM TBW téh, baris diseléksi sacara nembrak. Anapon pikeun pandaftarannana geus dibuka, nya éta salila saminggu, cindekna ti tanggal 6 nepi ka tanggal 13 Fébruari 2019.

Tah ku sabab kitu, pikeun para profésional anu minat ngeusi jabatan Diréktur PDAM TBW téh, sangkan sagancangna daftar ka Panitia Seléksi Jabatan Diréktur PDAM TBW Kota Sukabumi, sarta kudu ngalampirkeun rupa-rupa pasaratan anu geus ditetepkeun ku Panitia Seléksi Jabatan Diréktur PDAM TBW Kota Sukabumi.

Anapon jajaran Panitia Seléksi Jabatan Diréktur PDAM TBW Kota Sukabumi téh, geus ditetepkeun ku Wali Kota Sukabumi. Nya éta Ketua PLT Sekertaris Daérah Kota Sukabumi, Sekertaris Asistén Administrasi Setda Kota Sukabumi, Drs. H. Kostaman, M.M., Anggota Kapala Bagian Paékonomian, Pangwangunan jeung Kerjasama Daérah Setda Kota Sukabumi, Rahmat Sukandar, S.Si., M.T., M.Sc., sarta ti Unsur Akademisi, Dr. Sakti Alamsyah, M.Pd. Salian ti éta, ogé baris ngadatangkeun ti Perpamsi (Persatuan Perusahaan Air Minum Seluruh Indonésia) jeung Psikolog.

Sedengkeun prosés seléksina baris dilaksanakeun sababaraha tahapan, diantarana seléksi adminitrasi, psikotés, tés tinulis jeung pamaparan rancana bisnis. Anapon pasaratan adminitrasi sacara umum, diantarana umur paling ngora 35 taun jeung umur paling kolot 55 taun dina mangsa daftar. Salian ti éta ogé kudu ngabogaan pangalaman gawé saeutikna 5 taun dina widang manajerial pausahaan anu ngabogaan badan hukum, jeung pernah mingpin tim anu dibuktikeun ku surat katerangan kalayan ajénna hadé ti pausahaan saméméhna, sarta rupa-rupa katangtuan lianna.

Leave a Reply