DI ÉRA MILÉNIAL MÉDSOS KACIDA GAMPANGNA DIAKSÉS KU SAKUMNA MASARAKAT

Reporter/Redaktur/Editor : ENDANG SUMARDI

Wali Kota Sukabumi, H. Achmad Fahmi nandeskeun, di éra milénial danget  ieu, Médsos (Média Sosial) kacida gampangna diaksés ku sakumna masarakat. Ku lantaran kitu, peran pamaréntah dina nyanghareupan éta hal téh, diantarana nepikeun sosialisasi jeung édukasi dina ngagunakeun médsos sacara hadé jeung wijak ka sakumna masarakat. Alatan médsos téh teu bisa diblok atawa disingkahan, lantaran ngarupakeun sala sahiji usaha pikeun ngahangkeutkeun téhnologi. Ku sabab kitu, pamaréntah hayang ngawujudkeun katahanan kulawarga anu hadé, antara bapa, indung jeung anak, hususna dina nepikeun sosialisasi jeung édukasi tingkah laku jeung moral anu hadé sarta ngabogaan basis katahanan kulawarga.

Panandesan Wali Kota Sukabumi éta téh, ditepikeun dina biantara dina kagiatan FGD (Forum Group Discussion), anu dicalagarakeun ku Polres Sukabumi Kota, di Ballroom Hotél Pangrango Sukabumi, anu ngangkat téma Peran jeung Tangtangan Pamuda di Ěra Generasi Milénial. Hadir dina kasempetan éta, unsur pamaréntahan, akademisi, praktisi, inohong agama, inohong masarakat jeung pamuda sa wilayah hukum Polres Sukabumi Kota.

Salajuna ditandeskeun, ayana médsos anu gampang diaksés ku sakumna masarakat téh, ngarupakeun sala sahiji tangtangan anu kacida gedéna pikeun pamaréntah. Ku lantaran kitu, ngaliwatan kagiatan FGD anu dicalagarakeun ku Polres Sukabumi Kota téh, bisa méré pamahaman anu hadé jeung bener dina ngagunakeun kamajuan éta téhnologi, hususna médsos sacara pinter jeung wijak. Salian ti éta, Wali Kota Sukabumi ogé cumeluk sakaligus meredih ka sakumna masarakat hususna ka para nonoman, sangkan jadi generasi milénial anu positif sarta terus digawé jeung ilu biung sacara aktif dina sagala rupa widang pangwangunan di Kota Sukabumi, kaasup dina ngagunakeun médsos sacara hadé jeung bener.

Sedengkeun Kapolres Sukabumi Kota, AKBP Susatyo Purnomo Condro, S.H., S.I.K., M.Si. ngajelaskeun, ieu FGD téh digagas sabagé sala sahiji wujud pahatian jeung kapadulian Polri ka kaom milénial dina nyanghareupan éra anu can jeung teu biasa. Lantaran kamajuan téhnologi di éra milénial téh kacida cepetna, kaasup sagala rupa sisi posiif jeung négatifna. Tah ku sabab kitu, sakumna masarakat utamana kaom milénial, perlu dibéré pamahaman anu hadé jeung bener hususna dina ngagunakeun médsos. Maksud jeung tujuannana, nya éta pikeun nyiptakeun jeung ngaronjatkeun Kamtibmas (Kaamanan jeung Katartiban Masarakat) sarta kaayaan konduif wewengkon Kota Sukabumi, nya éta aman, tengtrem, tartib, ayem jeung rukun.

Leave a Reply