PAMARÉNTAH KOTA SUKABUMI JEUNG DPRD KOTA SUKABUMI NGASAHKEUN DUA RAPERDA

Reporter : KHAERU SOBRI

Redaktur/Editor : ENDANG SUMARDI

Pamaréntah Kota Sukabumi jeung DPRD Kota Sukabumi, ngasahkeun dua Raperda (Rancangan Peraturan Daérah) Kota Sukabumi, jadi Perda (Peraturan Daérah) Kota Sukabumi anu définitif, nya éta Perda ngeunaan LPPL (Lembaga Panyiaran Publik Lokal) Radio jeung Perda ngeunaan Pangalolaan Cai Limbah Doméstik. Pangasahan kadua éta Perda téh, dilaksanakeun dina Rapat Paripurna DPRD Kota Sukabumi, cindekna di Rohangan Rapat Paripurna DPRD Kota Sukabumi. Hadir dina kasempetan éta, Wali Kota Sukabumi, H. Achmad Fahmi, Wakil Wali Kota Sukabumi, H. Andri S. Hamami, S.H., M.H., unsur FKPD (Forum Komunikasi Pingpinan Daérah) Kota Sukabumi, PLT (Palaksana Tugas) Sekertaris Daérah Kota Sukabumi, para Asistén Daérah Setda Kota Sukabumi, para Kepala OPD (Organisasi Perangkat Daerah), para Camat jeung Lurah sarta para tamu ondangan lianna.

Dina biantarana Wali Kota Sukabumi ngajelaskeun, disahkeunnana Perda LPPL Radio téh, pikeun nyumponan pasaratan panyalagaraan LPPL Radio. Ěta hal téh luyu jeung pasal 9 ayat 1 A Paraturan Mentri Komunikasi jeung Informatika Nomor 18 Tahun 2016 ngeunaan Pasaratan jeung Tata Cara Paijinan Panyalagaraan Panyiaran. Salian ti éta, LPPL Radio téh diharepkeun jadi média panyiaran di daérah, anu ngabogaan peran penting, strategis jeung éféktif dina méré kasaimbangan informasi atikan, kabudayaan jeung hiburan anu positif ka masarakat, anu pamustungannana bisa ngarojong kana kalancaran pangwangunan, kagiatan pamaréntahan jeung kamasarakatan. Salajuna dijelaskeun, LPPL Radio Kota Sukabumi anu dingaranan Swara Perintis Kota Sukabumi téh, diharepkeun bisa ngalaksanakeun fungsina sabagé média informasi atikan, hiburan anu séhat, kontrol jeung pangrapet sosial, sarta miara budaya katut koordinasi jeung kamitraan antara lembaga panyiaran radio daérah, média massa jeung para pamangku kapentingan lainna.

Sedengkeun disahkeunnana Perda Pangalolaan Cai Limbah Doméstik téh, diharepkeun cai limbah doméstik anu dipiceun ka média lingkungan di Kota Sukabumi, teu nimbulkeun kacemaran atawa karuksakan lingkungan, anu bisa nurunkeun darajat kaséhatan jeung produktifitas kagiatan masarakat. Disagigireun ti éta, ogé bisa mecut jeung ngahudangkeun sumanget sakumna lapisan masarakat dina ngaronjatkeun PHBS (Parilaku Hirup Bersih jeung Séhat). Lantaran dina Perda Pangalolaan Cai Limbah Doméstik téh, ditekenkeun sababara pantrangan nu aya kaitannana jeung kacemaran katut karuksakan lingkungan. Diantarana teu meunang miceun atawa nyalurkeun cai limbah doméstik ka jero taneuh atawa ka wahangan jeung sumber cai lianna. Saterusna teu meunang miceun barang-barang anu padet atawa runtah anu bisa nutupan saluran cai jeung barang-barang anu gampang kahuru atawa bitu, anu baris nimbulkeun bahaya atawa karuksakan jaringan cai limbah doméstik, sarta teu meunang miceun hasil sedotan leutak tinja tanpa ijin.

Leave a Reply