NGARAN LPPL RSPD KOTA SUKABUMI DIGANTI JADI SWARA PERINTIS RSPD KOTA SUKABUMI

Reporter/Redaktur/Editor : ENDANG SUMARDI

Ngaran LPPL (Lembaga Panyiaran Publik Lokal) RSPD (Radio Siaran Pamaréntah Daérah) 93,1 FM Kota Sukabumi, diganti jadi Swara Perintis RSPD Kota Sukabumi. Anapon panggantian éta ngaran RSPD Kota Sukabumi téh, ditetepkeun jeung disahkeun ku Pamaréntah Kota Sukabumi jeung DPRD Kota Sukabumi, ngaliwatan Perda (Peraturan Daérah) Kota Sukabumi ngeunaan LPPL Radio Kota Sukabumi, dina Rapat Paripurna DPRD Kota Sukabumi, anu lumangsung di Rohangan Rapat Paripurna DPRD Kota Sukabumi.

Wali Kota Sukabumi, H. Achmad Fahmi ngajelaskeun, ditetepkeun jeung disahkeunnana LPPL Swara Perintis RSPD Kota Sukabumi téh, pikeun nyumponan pasaratan panyalagaraan LPPL Radio Kota Sukabumi, luyu jeung pasal 9 ayat 1 A Paraturan Mentri Komunikasi jeung Informatika Nomer 18 Taun 2016 ngeunaan Pasaratan jeung Tata Cara Paijinan Panyalagaraan Panyiaran.

Wali Kota Sukabumi ngaharepkeun, ku geus ditetepkeun jeung disahkeunnana LPPL Swara Perintis RSPD Kota Sukabumi téh, bisa jadi média panyiaran di Kota Sukabumi, sarta ngabogaan peran anu penting pisan, strategis jeung éféktif dina méré kasaimbangan béwara atikan, kabudayaan jeung hiburan anu sifatna positif ka masarakat, anu panustrungannana bisa ngarojong kana kalancaran pangwangunan, sarta kagiatan pamaréntahan jeung kamasarakatan.

Lian ti éta ogé diharepkeun, LPPL Swara Perintis RSPD Kota Sukabumi téh, bisa ngalaksanakeun fungsina sebagé média informasi atikan jeung hiburan anu séhat, sarta kontrol jeung pangrapet sosial, jadi palestari budaya sarta ngalaksanakeun koordinasi jeung kamitraan katut lembaga panyiaran radio daérah lainna, kaasup jeung média masa sarta para pamangku kapentingan lainna, anu oriéntasina kana kapentingan sakumna lapisan masarakat. Disagigireun ti éta, ku geus ditetepkeun jeung disahkeunnana LPPL Swara Perintis RSPD Kota Sukabumi téh, kudu sagancangna disosialisasikeun ka sakumna lapisan masarakat.

Sedengkeun Ketua Pansus (Panitia Husus) DPRD Kota Sukabumi Pangbahasan Raperda (Rancangan Peraturan Daérah) Kota Sukabumi ngeunaan LPPL Radio Kota Sukabumi, H. Olih Solihin ngajelaskeun, ditetepkeun jeung disahkeunnana Raperda Kota Sukabumi ngeunaan LPPL Radio Kota Sukabumi jadi Perda Kota Sukabumi sacara définitif téh, luyu jeung paraturan anyar, yén Paijinan Radio kaasup Radio Pamaréntah Daérah, kudu didasarkeun Perda. Tapi saupama geus ngabogaan ISR (Ijin Siar Radio) mah, ngan ukur ngaqlengkepan pasaratan lainna anu can dicumponan. Tapi LPPL RSPD Kota Sukabumi mah geus ngabogaan Ijin Prinsip jeung ISR. Ngan ku lantaran aya paraturan anyar, paijinannana kudu dumasar kana Perda.

Leave a Reply