PANYALURAN BANSOS DI KOTA SUKABUMI GEUS LUMANGSUNG HADÉ JEUNG LANCAR

  Reporter/Redaktur/Editor : ENDANG SUMARDI

Wali Kota Sukabumi, H. Achmad Fahmi nandeskeun, panyaluran Bansos (Bantuan Sosial) di Kota Sukabumi, boh ti Pamaréntah Puseur boh ti Pamaréntah Provinsi Jawa Barat jeung ti Pamaréntah Kota Sukabumi, geus lumangsung hadé jeung lancar. Ngan parandéné kitu, dina panyaluran Bansos téh diperlukeun kontribusi ti Polri (Kapolisian Républik Indonésia), supaya bisa nyampurnakeun panyaluran Bansos ka masarakat sarta bener-bener tepat sasaran.

Panandesan Wali Kota Sukabumi éta téh, ditepikeun basa mingpin Rakor (Rapat Koordinasi) Nota Kasapahaman atawa MoU (Mémorandum of Understanding) antara Polri jeung Kemensos (Kementrian Sosial) RI, ngeunaan panyaluran Bansos, cindekna di Operation Room Setda Kota Sukabumi, dibarengan ku Wakil Wali Kota Sukabumi, H. Andri S. Hamami, S.H., M.H., Kapolres Sukabumi Kota, AKBP Susatyo Purnomo Condro, S.H., S.I.K., M.Si. katut PLT (Palaksana Tugas) Kapala Dines Sosial Kota Sukabumi, Hudi Kodir Wahyu, S.Sos., M.K.M.

Salajuna ditandeskeun, Pamaréntah Kota Sukabumi katut Polres Sukabumi Kota, sapamadegan arék usaha satékah polah nyukséskeun program Bansos Taun 2019 di Kota Sukabumi. Lantaran Bansos téh jadi program taunan pamaréntah, boh Pamaréntah Puseur boh Pamaréntah Provinsi Jawa Barat katut Pamaréntah Kota Sukabumi, pikeun ngénténgkeun jeung ngahampangkeun kabeurat masarakat anu teu mampuh.

Sedengkeun PLT Kapala Dines Sosial Kota Sukabumi, Hudi Kodir Wahyu, S.Sos., M.K.M. ngajelaskeun, panyaluran Bansos téh kudu dirojong jeung dibantu ku sakumna pihak, kaasup ku Polri. Maksud jeung tujuannana, sangkan panyaluran Bansos téh bisa lumangsung hadé jeung lancar sarta bener-bener tepat sasaran.

Saterusna dijelaskeun, panyaluran Bansos téh lain ukur dilaksanakeun di Indonésia wungkul, tapi ogé dilaksanakan di nagara-nagara liana, sarta bisa ngaronjatkeun kasajahtraan masarakatna, kaasup di Indonésia. Salian ti éta ogé dijelaskeun, Bansos téh disalurkeun ka masarakat anu miskin pisan, sarta meunang rupa-rupa Bansos. Nya éta Bansos PKH (Program Kulawarga Harepan), KIS (Kartuh Indonésia Séhat), KIP (Kartuh Indonésia Pinter) jeung BPNT (Bantuan Pangan Non Tunéy).

Leave a Reply