WALI KOTA SUKABUMI NGECÉK PAMASANGAN KOTAK SOARA PAMILU

Reporter/Redaktur/Editor : ENDANG SUMARDI

Wali Kota Sukabumi, H. Achmad Fahmi dibarengan ku Kapolres Sukabumi Kota, AKBP Susatyo Purnomo Condro, S.H., S.I.K., M.Si., Dandim 0607 Kota Sukabumi, Létkol Kav. Mujahidin, S.Sos. katut Ketua KPU (Komisi Pamilihan Umum) Kota Sukabumi, Dra. Sri Utami, M.M., ngecék Pamasangan Kotak Soara Pamilu  (Pamilihan Umum) Bareng Taun 2019, cindekna di Gudang Logistik KPU Kota Sukabumi, Jalan Cemerlang Kota Sukabumi.

Dina kasempetan éta Wali Kota Sukabumi ngajelaskeun, dilaksanakeunnana éta pangecékan téh pikeun mastikeun kasiapan Pamilu Bareng Taun 2019 di Kota Sukabumi, nya éta Pamilu Persidén katut Wakil Persidén RI, sarta Pamilu Anggota DPR RI, DPD RI, DPRD Provinsi Jawa Barat jeung DPRD Kota Sukabumi, cindekna tanggal 17 April 2019 nu bakal datang. Salajuna Wali Kota Sukabumi ngaharepkeun, Pamilu Bareng Taun  2019, di Kota Sukabumi bisa lumangsung lancar sarta aman jeung rukun. Salian ti éta, Pamilu anu sakeudeung deui baris dicalagarakeun jeung tahapannana geus dilaksanakeun téh, Kota Sukabumi bisa jadi palaksana Pamilu pang hadéna. Ku sabab kitu, Wali Kota Sukabumi meredih ka sakumna aparat Pamaréntah, Panyalagara Pamilu jeung Pamilon Pamilu di Kota Sukabumi, sangkan ngaronjatkeun sumangat jeung sabilulungan, sarta siap ngalaksanakeun Pamilu anu bersih jeung ngabogaan integritas anu hadé.

Disagigireun ti éta, Wali Kota Sukabumi cumeluk ka sakumna lapisan masarakat Kota Sukabumi, sangkan ilubiung sacara aktif dina palaksanaan Pamilu Bareng Taun  2019, ku cara nyalurkeun hak pilih sarta salawasna merhatikeun sakaligus ngajaga jeung ngajungjung luhur ajén-inajén démokrasi, sakaligus ngaronjatkeun kasadaran dina ngajalankeun pulitik, pikeun nangtukeun nasib bangsa jeung nagara ka hareup, hususna dina rupa-rupa kawijakan jeung program pangwangunan kanu leuwih hadé deui.

Saterusna dijelaskeun, palaksanaan éta Pamilu téh ngarupakeun ajang pésta démokrasi masarakat Indonésia. Ku lantaran kitu, Wali Kota Sukabumi ngaharepkeun, palaksanaan éta Pamilu téh bisa dijadikeun sarana jeung wahana ngahijina bangsa, kaasup dina ngalaksanakeun hak jeung kawajiban sabagé warga nagara Indonésia anu hadé, hususna dina ngawujudkeun kadaulatan rahayat. Ku kituna, sakumna lapisan masarakat Indonésia bébas milih jeung nyalurkeun soara ka Calon Persidén katut Wakil Persidén RI, sarta Anggota DPR RI, DPD RI, DPRD Provinsi Jawa Barat jeung DPRD Kota Sukabumi, anu bisa ngajalankeun amanah rahayat, hususna dina ngaronjatkeun kasajahtraan bangsa jeung nagara.

Leave a Reply