RÉA FAKTOR ANU NYABABKEUN KAJADIANNANA BENCANA CAAH DI KOTA SUKABUMI

Reporter/Redaktur/Editor : ENDANG SUMARDI

Réa faktor anu nyababkeun kajadiannana bencana caah di Kota Sukabumi, diantarana sediméntasi jeung rupa-rupa jenis tumpukan runtah, sarta wangunan anu ngareumpak GSS (Garis Sempadan Sungéy). Saperti bencana caah anu kajadian sawatara waktu ka tukang di wewengkon RT 02 RW 05 Kalurahan Jayamekar, RT 04 RW  05 Kalurahan Sudajaya Hilir jeung Kampung Pangkalan RT 01 RW 06 Kalurahan Sudajaya Hilir Kacamatan Baros, sarta di Kampung Lio RT 02 RW 02 Kalurahan Cikondang Kacamatan Citamiang cindekna di tukangeun Terminal K.H. Ahmad Sanusi Kota Sukabumi, diakibatkeun ku ngaleutikannana lebar wahangan anu disababkeun ku réana wangunan anu ngareumpak GSS, anu panustrungannana cai wahangan mudal ka pamukiman masarakat, lantaran teu mampuh nampung debit cai.

Kapala Widang Gakda jeung SDA (Panegakan Paraturan Daérah jeung Sumber Daya Aparatur) Dines Satpol PP (Satuan Polisi Pamong Praja) Kota Sukabumi, Sudrajat, S.H. nandeskeun, sakumna wangunan anu ngareumpak GSS, geus diingetan jeung ditegor, boh ku lisan boh ku surat. Sabab pikeun nindak sacara tegas ka sakumna wangunan anu ngareumpak GSS di Kota Sukabumi téh, pihakna can bisa ngalaksanakeunnana, lantaran can aya Perda (Peraturan Daérah) Kota Sukabumi anu ngatur jeung mantrang ngadegkeun wangunan di GSS di Kota Sukabumi. Salian ti éta, ogé di satiap OPD (Organisasi Parangkat Daérah) nu aya kaitannana di Kota Sukabumi, baris leuwih hadé saupama ngabogaan PPNS (Panyidik Pagawé Negri Sipil), anu bisa méré rékoméndasi téknis kana ngeunaan GSS di Kota Sukabumi.

Kapala Widang Gakda jeung SDA Satpol PP Kota Sukabumi ngaharepkeun, ka hareup aya Perda Kota Sukabumi anu ngatur jeung mantrang ngadegkeun wangunan di GSS di Kota Sukabumi, pikeun ditanjeurkeun jeung dilaksanakeun sacara optimal, supaya lebar wahangan di Kota Sukabumi teu ngarandapan ngaleutikan, anu bisa nimbulkeun kana kajadiannana bencana caah di Kota Sukabumi.

Sedengkeun Kapala Séksi Panyegahan jeung Kasiapsiagaan BPBD (Badan Pananggulangan Bencana Daérah) Kota Sukabumi, Akhmad Zulkarnain, S.E. ngajelaskeun, hasil analisis jeung panalingaan tim ti DPU-PRP-KPP (Dines Pekerjaan Umum, Panataan Rohang, Paimahan, Kawasan Pamukiman jeung Patanahan) Kota Sukabumi, mudalna cai wahangan anu kajadian di wewengkon éta kacamatan téh, diakibatkeun ku ngaheureutannana lebar wahangan. Anapon ngeunaan sediméntasi jeung rupa-rupa jenis tumpukan runtah di wahangan di éta wewengkon kacamatan téh, geus diberesihan babarengan jeung masarakat nu aya di sabudeureun éta wahangan.

Leave a Reply