SAKUMNA ASN SANGKAN TEU NGA-SHARE RUPA-RUPA BÉWARA ANU CAN JELAS BENER HENTEUNA DI MÉDSOS

Reporter/Redaktur/Editor : ENDANG SUMARDI

Wali Kota Sukabumi, H. Achmad Fahmi, meredih ka sakumna ASN (Aparatur Sipil Nagara) di lingkungan Pamaréntah Kota Sukabumi, sangkan teu nga-share rupa-rupa béwara anu can jelas bener henteuna di Médsos (Média Sosial). Ku lantaran kitu, saupama manggihan hiji béwara di Médsos, kudu dipastikeun heula bener henteuna. Pameredih Wali Kota Sukabumi éta téh, ditepikeun dina Rakor (Rapat Koordinasi) jeung unsur FKPD (Forum Komunikasi Pingpinan Daérah) Kota Sukabumi katut para Kapala OPD (Organisasi Parangkat Daérah) sarta para Camat jeung Lurah sa Kota Sukabumi, ngabahas rupa-rupa béwara anu dimuat hususna di Médsos anu can jelas bener henteuna, di Gedong Juang 45 Kota Sukabumi.

Wali Kota Sukabumi ngajelaskeun, pangwangunan anu dilaksanakeun dina danget ieu, diantarana ngahangkeutkeun pangwangunan infrastruktur jeung transportasi anu beuki gampang diaksés ku sakumna lapisan masarakat. Ku sabab kitu, sakumna ASN di lingkungan Pamaréntah Kota Sukabumi, kudu bisa ngungkulan kana rupa-rupa pangaruh négatif tina éta pangwangunan. Disagigireun ti éta, sakumna ASN di lingkungan Pamaréntah Kota Sukabumi, sabagé duta Pamaréntah Kota Sukabumi kudu bisa ngajaga kaamanan wewengkon Kota Sukabumi, ku cara ngajak sakumna lapisan masarakat, pikeun babarengan ngajaga sakaligus ngaronjatkeun kaamanan, katartiban, katengtreman, kaayeman jeung karukunan di wewengkonna masing-masing, babarengan jeung aparat Kapulisian katut TNI sarta instansi jeung lembaga nu aya kaitannana.

Anu teu éléh penting, sakumna ASN di lingkungan Pamaréntah Kota Sukabumi katut sakumna lapisan masarakat Kota Sukabumi, sangkan babarengan nyukséskeun Pamilu (Pamilihan Umum) Bareng Taun 2019, nya éta Pamilu Persidén katut Wakil Persidén RI sarta Pamilu Anggota DPR RI, DPD RI, DPRD Provinsi Jawa Barat jeung DPRD Kota Sukabumi, cindekna tanggal 17 April 2019 nu bakal datang, ku cara nyalurkeun hak soarana di TPS (Tempat Pamungutan Soara)-na masing-masing, luyu jeung kahayang katut pilihannana masing-masing. Wali Kota Sukabumi ngaharepkeun, angka partisipasi pamilih anu ngagunakeun hak soarana di Kota Sukabumi dina Pamilu Bareng Taun 2019 bisa ngahontal angka 80 peresén, atawa ngarandapan naék tina Pilkada (Pamilihan Kapala Daérah) Bareng Taun 2018.

Ěta Rakor jeung unsur FKPD Kota Sukabumi katut para Kapala OPD sarta para Camat jeung Lurah sa Kota Sukabumi téh, dieusi pamaparan ti Kapolres Sukabumi Kota, Dandim 0607 Kota Sukabumi, Ketua Pangadilan Negri Sukabumi, jeung pawakilan ti Kajaksaan Negri Sukabumi.

Leave a Reply