PAMARÉNTAH KOTA SUKABUMI NGARONJATKEUN KOLABORASI JEUNG PAMARÉNTAH PROVINSI JAWA BARAT

Reporter/Redaktur/Editor : ENDANG SUMARDI

Pamaréntah Kota Sukabumi salawasna usaha satékah polah ngaronjatkeun kolaborasi jeung Pamaréntah Provinsi Jawa Barat, sabab rupa-rupa program Pamaréntah Provinsi Jawa Barat baris jadi program Pamaréntah Kota Sukabumi. Kitu deui rupa-rupa program pangwangunan Pamaréntah Kota Sukabumi anu geus ditepikeun ka Pamaréntah Provinsi Jawa Barat, bisa ditarima sakaligus disaluyuan ku Gubernur Jawa Barat, anu panustrungannana rupa-rupa program pangwangunan di Kota Sukabumi bisa dilaksanakeun jeung diwujudkeun sacara gancang.

Ěta hal téh ditepikeun ku Wali Kota Sukabumi, H. Achmad Fahmi, basa miluan sakaligus maparkeun rupa-rupa program prioritas Pamaréntah Kota Sukabumi kaasup rupa-rupa masalah anu disanghareupan ku Pamaréntah Kota Sukabumi, dina kagiatan Forum Kopdar (Koordinasi Panyalagaraan Pamaréntahan Daérah) Provinsi Jawa Barat Taun 2019, anu diiluan ku 27 Kapala Daérah sa Jawa Barat, cindekna di Green Forest Lémbang Kabupatén Bandung anyar-anyar ieu.

Saterusna dijelaskeun, dilaksanakeunnana ieu kagiatan téh dina raraga ngamantepkeun jeung ngaronjatkeun sinkronisasi rupa-rupa program pangwangunan di Tingkat Provinsi Jawa Barat sarta di Tingkat Kabupatén jeung Kota sa Jawa Barat, anu baris dilaksanakeun dina taun 2020 nu bakal datang.

Salian ti éta, ogé dina raraga ngainténsifkeun komunikasi jeung silaturahmi antara Gubernur Jawa Barat jeung para Bupati katut Wali Kota sarta para panyalagara pamaréntahan daérah lianna di Jawa Barat, supaya ngawujud hubungan jeung tata kalola pamaréntahan anu sinergis, antara Pamaréntah Provinsi Jawa Barat jeung Pamaréntah Kabupatén katut Pamaréntah Kota sa Jawa Barat.

Leuwih jauh dijelaskeun, Pamaréntah Kota Sukabumi baris salawasna usaha satékah polah ngarojong jeung ngalaksanakeun rupa-rupa program anu digulirkeun ku Pamaréntah Provinsi Jawa Barat, diantarana program Jabar Quick Résponse, program Layad Rawat, jeung program Kiridit Mesra (Mesjid Sajahtra).

Anapon anu milu marengan Wali Kota Sukabumi dina éta kagiatan téh, nya éta Asistén Pamaréntahan Setda Kota Sukabumi, Drs. H. Andri Setiawan, M.M., PLT (Palaksana Tugas) Asistén Paékonomian jeung Pangwangunan Setda Kota Sukabumi, Drs. H. Kostaman, M.M., Kapala Bappeda (Badan Parancanaan Pangwangunan Daérah) Kota Sukabumi, Ir. H. Rudi Djuansyah, Kapala Bagian Tapem (Tata Pamaréntahan) Setda Kota Sukabumi, Téjo Condro Nugroho, A.P., M.T., sarta Kapala Bagian Humas (Hubungan Masarakat) jeung Protokol Setda Kota Sukabumi, Punjul Saépul Hayat, S.STP., M.Si.

Leave a Reply