ANU GEUS BOGA LEUIT PANGAN MASARAKAT KAKARA 13 KALURAHAN

Reporter/Redaktur/Editor : ENDANG SUMARDI

Kapala Sĕksi Distribusi jeung Cadangan Pangan DKP3 (Dines Katahanan Pangan, Patanian jeung Paikanan) Kota Sukabumi, Fĕrry Nur Trisnawati, S.Pt., M.M. ngungkabkeun, tina 33 kalurahan sa Kota Sukabumi, anu geus boga Leuit Pangan Masarakat kakara 13 kalurahan, diantarana Kalurahan Sudajaya Hilir Kacamatan Baros, Kalurahan Babakan jeung Kalurahan Sindang Palay Kacamatan Cibeureum, sarta Kalurahan Lembursitu Kacamatan Lembursitu.

Salajuna dijelaskeun, kuduna satiap kalurahan di Kota Sukabumi boga Leuit Pangan Masarakat. Ngan sababaraha kalurahan nyanghareupan pasualan, diantarana dina nyadiakeun lahan salega 4 mĕter kali 6 mĕter. Sabab pasaratan pikeun ngawangun Leuit Pangan Masarakat tĕh, kudu dina lahan hibah ti masarakat salega 4 mĕter kali 6 mĕter, lantaran taya anggaran ti kalurahan atawa ti pamarĕntah pikeun ngayakeun ĕta lahan.

Salian ti ĕta, sababaraha kalurahan jeung masarakat ngabogaan anggapan, yĕn Leuit Pangan Masarakat tĕh kudu diwangun di arĕa pasawahan. Tapi ĕta anggapan tĕh teu tepat, sabab ĕta Leuit Pangan Masarakat tĕh bisa diwangun dimana waĕ kaasup di  pamukiman masarakat, anu penting kudu dina lahan hibah ti masarakat.

Ku lantaran kitu, pihakna baris usaha satĕkah polah ngalaksanakeun sosialiasi jeung ngatik masarakat di satiap kalurahan, ngerunaan pangwangunan jeung pentingna ngabogaan Leuit Pangan Masarakat. Disagigireun ti ĕta ogĕ dijelaskreun, Leuit Pangan Masarakat teu kudu mangrupa bĕas waĕ, tapi bisa mangrupa pangan poko strategis lianna, saperti gula, minyak jeung nu sĕjĕnna.

Saterusna dijelaskeun, pangwangunan Leuit Pangan Masarakat tĕh, luyu jeung pasal 23 Undang-Undang Nomer 18 Taun 2012 ngeunaan Pangan ngajelaskeun, yĕn dina ngawujudkeun Kadaulatan Pangan, Kamandirian Pangan jeung Katahanan Pangan, Pamarĕntah Netepkeun Cadangan Pangan Nasional, nya ĕta Cadangan Pangan Pamarĕntah Puseur, Cadangan Pangan Pamarĕntah Daĕrah jeung Cadangan Pangan Masarakat. Maksud jeung tujuannana, pikeun ngungkulan kakurangan pangan, kaleuwihan pangan, gejolak harega pangan jeung kaayaan darurat.

Disagigireun ti ĕta ogĕ luyu jeung Undang-Undang Nomer 23 Taun 2014 ngeunaan Pangbagian Urusan Pamarĕntahan Widang Pangan, Pamarĕntah Daĕrah boh Provinsi boh Kabupatĕn jeung Kota ngabogaan tanggungjawab pikeun ngalaksanakeun pangwangunan Cadangan Pangan Pamarĕntah. Sedengkeun Cadangan Pangan Masarakat, bisa dititĕn tina Pangembangan Leuit Pangan Masarakat, hususna dina ngaronjatkeun aksĕs pangan masarakat. Leuwih jauh dijelaskeun, Leuit Pangan Masarakat tĕh ngarupakeun sala sahiji modĕl parangkat katahanan pangan masarakat anu cukup ĕfĕktif, sabagĕ tempat panyimpenan pikeun ngajaga stabitas pasokan pangan.

Leave a Reply