DISKOMINFO KABUPATÉN BEKASI NGALAKSANAKEUN KUNKER KA DISKOMINFO KOTA SUKABUMI

Reporter : KHAERU SOBRI

Redaktur/Editor : ENDANG SUMARDI

Réngréngan Diskominfo (Dines Komunikasi jeung Informatika) Kabupatén Bekasi, ngalaksanakeun Kunker (Kunjungan Kerja) ka Diskominfo Kota Sukabumi, anyar-anyar ieu. Anapon kadatangan réngréngan Diskominfo Kabupatén Bekasi anu dipingpin langsung ku Kapala Diskominfo Kabupatén Bekasi, Rohim Sutisna téh, dibagéakeun sakaligus ditarima sacara resmi ku Kapala Diskominfo Kota Sukabumi, Drs. H. Gabril Majid Sukarman, M.Pd., dibarengan ku Sekertaris Diskominfo Kota Sukabumi, Kurnia Rahmandani, S,IP., Kapala Widang PIPS (Pangalolaan Informasi Publik jeung Statistik), Tantan Sontani, S.IP., M.Si., Kapala Widang Infrastruktur TIK (Téknologi, Informasi jeung Komunikasi) sarta Pasandian jeung Integrasi Data, H. Yuli Noviawan, S.T., M.T., katut para Kapala Sub Bagian jeung para Kapala Séksi, di Rohangan Rapat Diskominfo Kota Sukabumi.

Kapala Diskominfo Kabupatén Bekasi, Rohim Sutisna ngajelaskeun, dilaksanakeunnana ieu kunker téh dina raraga silaturahmi sakaligus studi banding, pikeun ngaronjatkeun kapabilitas aparatur Diskominfo Kabupatén Bekasi, hususna ngeunaan LPPL (Lembaga Panyiaran Publik Lokal) Radio jeung Télévisi, katut pangalolaan, paijinan jeung nu séjénna.

Saterusna dijelaskeun, hasil kunker ti Diskominfo Kota Sukabumi téh, arék dijadikeun bahan évaluasi sarta baris diterapkeun jeung dimekarkeun dina ngalaksanakeun LPPL Radio jeung Télévisi, katut kontén Diskominfo Kabupatén Bekasi. Lian ti éta ogé dijelaskeun, dipilihna Diskominfo Kota Sukabumi jadi tempat kunker téh, lantaran Diskominfo Kota Sukabumi kaasup sala sahiji tina 25 kabupatén jeung kota sa Indonésia, anu kapilih dina ngamekarkeun smart city. Ku sabab kitu, pihakna baris salawasna usaha satékah polah ngalaksanakeun komunikasi jeung Diskominfo Kota Sukabumi, supaya salawasna meunang input pikeun ngaronjatkeun jeung ngamekarkeun kontén Diskominfo Kabupatén Bekasi. Komo deui dina danget ieu, Kabupatén Bekasi téh keur ngalaksanakeun pangembangan nuju smart city.

Sedengkeun Kapala Diskominfo Kota Sukabumi sakaligus sabagé Sekjén (Sekertaris Jéndral) Asosiasi LPPL Radio jeung Télévisi  Nasional, Drs. H. Gabril Majid Sukarman, M.Pd. ngajelaskeun, kunker anu dilaksanakeun ku réngréngan Diskominfo Kabupatén Bekasi téh, ngarupakeun ajang silaturahim sakaligus sharing informasi ngeunaan LPPL Radio jeung Télévisi katut program séjénna di Kota Sukabumi, anu bisa diterapkeun jeung dimekarkeun di Kabupatén Bekasi, saperti smart city.

Leave a Reply