WALI KOTA SUKABUMI MEUNANG LAYANG PANGAJÉN THE MOST INSPIRING AND INNOVATIVE FIGURE AWARD 2019

Reporter/Redaktur/Editor : ENDANG SUMARDI

Wali Kota Sukabumi, H. Achmad Fahmi, meunang Layang Pangajén The Most Inspiring and Innovative Figure Award 2019, ti Séven Média Asia, anyar-anyar ieu. Éta Layang Pangajen téh, dipasrahkeun ku Ketua Séven Média Asia, Restu, ka Wali Kota Sukabumi katut sajumlah Gubernur, Bupati jeung Wali Kota séjénna, di The Trans Resort Hotél Bali.

Anapon para pajabat anu milu marengan Wali Kota Sukabumi dina narima éta layang pangajén teh, nya éta Asistén Pamaréntahan Setda Kota Sukabumi,. Drs. H. Andri Setiawan, M.M., Kapala Diskominfo (Dines Komunikasi jeung Informatika) Kota Sukabumi, Drs. H. Gabril Majid Sukarman, M.Pd., Kapala Disdukcapil (Dines Kapadumukan jeung Panyatetan Sipil) Kota Sukabumi, Iskandar, S.IP., M.T., Kapala Bagian Ortala (Organisasi jeung Tata Laksana) Setda Kota Sukabumi, Diar Ruswidjanarko, ATD., M.Éng.M., Kapala Bagian Humas (Hubungan Masarakat) jeung Protokol Setda Kota Sukabumi, Punjul Saépul Hayat, S.STP., M.Si., jeung Camat Citamiang, Fitrya Kusnaningsih, S.STP.

Wali Kota Sukabumi ngucapkeun rasa sukur ku dicangkingna ieu layang pangajén téh, sakaligus nandeskeun, yén ieu layang pangajén téh lain pikeun pribadi Wali Kota Sukabumi wungkul, tapi pikeun sakumna lapisan masarakat Kota Sukabumi. Sabab numutkeun Wali Kota Sukabumi, dicangkingna ieu layang pangajen téh, awalna jeung sumberna ti masarakat Kota Sukabumi.

Wali Kota Sukabumi ngaharepkeun, ieu layang pangajén téh bisa jadi pecut jeung panghudang sumanget pikeun sakumna aparatur di lingkungan Pamaréntah Kota Sukabumi, hususna pikeun pribadi Wali Kota Sukabumi, dina méré jeung ngaronjatkeun palayanan, sarta dina ngalaksanakeun hubungan, nyangking prestasi jeung ngalaksanakeun karya nyata pikeun masarakat Kota Sukabumi.

Ku sabab kitu, Wali Kota Sukabumi baris salawasna usaha satékah polah babarengan sarta sabilulungan jeung sakumna pihak, sakaligus ménta pangrojong ka sakumna lapisan masarakat Kota Sukabumi, hususna dina ngaronjatkeun jeung ngamekarkeun rupa-rupa widang pangwangunan di Kota Sukabumi.

Maksud jeung tujuannana, supaya Kota Sukabumi bisa leuwih maju ti waktu ka waktu, anu panustrungannana Visi Wali Kota katut Wakil Wali Kota Sukabumi, nya éta Ngawujudna Kota Sukabumi anu Réligieus, Ayem jeung Sajahtra, bener-bener ngawujud jeungt bisa dirasakeun ku sakumnna lapisan masarakat Kota Sukabumi.

Dina kasempetan éta, Wali Kota Sukabumi katut para pajabat liana, ngadongdon sakaligus niténan Stand Paméran Sukabumi City, anu diwakilan ku Disdukcapil Kota Sukabumi jeung Kacamatan Citamiang, dina kagiatan Internasional Reform Symposium and Régional Workshop, anu lumangsung di Bali Nusa Dua Convention Cénter.

Leave a Reply