PAMARÉNTAH KOTA SUKABUMI NGARONJATKEUN SILATURAHMI JEUNG UNSUR FORKOPINDA

Reporter/Redaktur/Editor : ENDANG SUMARDI

Pamaréntah Kota Sukabumi nyalagarakan coffe morning jeung ramah tamah, dina raraga nguntun sakaligus ngaronjatkeun silaturahmi jeung unsur Forkopinda (Forum Komunikasi Pimpinan Daérah) Kota Sukabumi sarta para Ketua RW jeung RT sa Kota Sukabumi. cindekna tanggal 7 April 2019, di Gedong Juang 45 Kota Sukabumi.

Ěta kagiatan anu dibuka sacara resmi ku Wakil Wali Kota Sukabumi, H. Andri S. Hamami, S.H., M.H. téh, dieusi pamaparan ti unsur Forkopinda Kota Sukabumi, dina ngajaga kondusifitas wewengkon Kota Sukabumi jeung Pésta Démokrasi Pamilu (Pamilihan Umum) Bareng Taun 2019, nya éta Pamilu Persidén katut Wakil Persidén RI, sarta Pamilu Anggota DPR RI, DPD RI, DPRD Provinsi Jawa Barat jeung DPRD Kota Sukabumi, anu baris dilaksanakeun dina tanggal 17 April 2019 nu bakal datang, ku méré jeung ngaronjatkeun kaamanan, katartiban, katengtreman jeung kaayeman ka masarakat Kota Sukabumi.

Dina biantarana Wakil Wali Kota Sukabumi ngajelaskeun, yén peran RW jeung RT téh kacida dibutuhkeunnana, dina bajoang ngawangun Kota Sukabumi dina sagala widang, kaasup dina nyukséskeun Pésta Démokrasi Pamilu Bareng Taun 2019 anu bersih jeung ngabogaan integritas anu hadé. Saterusna dijelaskeun, Pamaréntah Kota Sukabumi ngaharepkeun, kondusifitas wewengkon Kota Sukabumi kudu bisa dijaga kalawan hadé, sarta Pésta Démokrasi Pamilu Bareng Taun 2019 ogé kudu bisa lumangsug sacara hadé jeung ngabogaan ajén. Salian ti éta, Pamaréntah Kota Sukabumi ogé ngaharepkeun, sangkan dina Pésta Démokrasi Pamilu Bareng Taun 2019 téh, masarakat Kota Sukabumi taya nu golput, tapi kudu marilih luyu jeung pilihan jeung ati nurani masing-masing.

Wakil Wali Kota Sukabumi ngarasa yakin, Pésta Démokrasi Pamilu Bareng Taun 2019 di Kota Sukabumi bisa lumangsung kalayan hadé sarta kondusifitas wewengkon Kota Sukabumi ogé bisa dijaga sacara hadé, ku cara sauyunan jeung sabilulungan ti sakumna pihak, nya éta sakumna aparat parnaréntah jeung aparat kaamanan sarta sakumna lapisan masarakat Kota Sukabumi.

Disagigireun ti éta, Wakil Wali Kota Sukabumi ogé ngajelaskeun, dina kapamingpinannana katut Wali Kota Sukabumi, H. Achmad Fahmi, pihakna salawasana usaha satékah polah ngawujudkeun kapercayaan ngawangun Kota Sukabumi anu Réligius, Ayem jeung Sajahtra, sakaligus ngajaga kondusifitas wewengkon Kota Sukabumi, ku cara salawasna ngajaga kautuhan, kaamanan, katartiban, katengtreman jeung kaayeman, sarta ngajaga sakaligus ngaronjatkeun silaturahmi jeung sakumna pihak.

Leave a Reply