MASARAKAT KOTA SUKABUMI MALAR NYUKSÉSKEUN PAMILU BARENG TAUN 2019

Reporter/Redaktur/Editor : ENDANG SUMARDI

Wakil Wali Kota Sukabumi, H. Andri S. Hamami, S.H., M.H., kalayan asmana Kapala Daérah sarta Pamaréntah Kota Sukabumi katut KPU (Komisi Pamilihan Umum) Kota Sukabumi, meredih ka sakumna lapisan masarakat Kota Sukabumi, malar nyukséskeun Pamilu (Pamilihan Umum) Bareng Taun 2019, nya éta Pamilu Persidén katut Wakil Persidén RI, sarta Pamilu Anggota DPR RI, DPD RI, DPRD Provinsi Jawa Barat jeung DPRD Kota Sukabumi, cindekna tanggal 17 April 2019 nu bakal datang, ku jalan nyalurkeun kahayang jeung hak pilihna.

Pameredih Wakil Wali Kota Sukabumi éta téh, ditepikeun dina biantara basa ngalepas sacara resmi pamilon KPU Run, anyar-anyar ieu di Lapangan Merdéka Kota Sukabumi. Éta kagiatan anu diiluan ku sababaraha élemén masarakat téh, di mimitian ku acara Opening Flash Mob ti Rélawan KPU Kota Sukabumi.

Hadir dina kasempetan éta, Kapolres Sukabumi Kota, AKBP Susatyo Purnomo Condro, S.H., S.I.K., M.Si., Dandim 0607 Kota Sukabumi, Létkol Kav. Mujahidin, S.Sos., Ketua DPRD Kota Sukabumi, Yunus Suhandi, S.IP., Kapala Disdukcapil (Dines Kapadumukan jeung Penyatetan Sipil) Kota Sukabumi, Iskandar, S.IP., M.T., Ketua Bawaslu (Badan Pangawas Pamilu) Kota Sukabumi, H. Ending Muhidin, S.Sos., sarta para tamu ondangan lianna.

Salian ti éta, Wakil Wali Kota Sukabumi ogé ngaharepkeun, dina palaksanaan pésta dékokrasi Pamilu Bareng Taun 2019 téh, di masyarakat Kota Sukabumi teu kajadian pacéngkadan jeung pecah beulah ku ayana béda pilihan, tapi tetep kudu ngahiji jeung harmonis. Anu penting sakumna lapisan masarakat Kota Sukabumi bisa nyalurkeun kahayang jeung hak pilihna sacara aman, tartib, ayem jeung rukun. Lantaran ku éta hal téh, kondusifitas wewengkon Kota Sukabumi bisa dijaga sacara hadé.

Sedengkeun Ketua KPU Kota Sukabumi, Dra. Sri Utami, M.M. ngajelaskeun, kagiatan KPU Run ieu téh ngahaja dicalagarakeun dina mangsa mapag palaksanaan Pamilu Bareng Taun 2019, cindekna anu baris dicalagarakeun dina tanggal 17 April 2019 nu bakal dating. Salajuna dijelaskeun, dina kagiatan KPU Run téh, KPU ogé ngalaksanakeun sosialisasi sacara nembrak ngeunaan tata cara panyoblosan anu hadé jeung bener, sakaligus ngajak ka sakumna lapisan masarakat Kota Sukabumi, sangkan ngagunakeun hak pilih jeung kahayangna dina mangsa palaksanaan éta Pamilu.

Leave a Reply