ANGKA ILUBIUNG PAMILIH DI KOTA SUKABUMI DINA PAMILU BARENG TAUN 2019 NGAHONTAL 85 PERESÉN

Reporter/Redaktur/Editor : ENDANG SUMARDI

Asistén Pamaréntahan Setda Kota Sukabumi, Drs. H. Andri Setiawan, M.M. salaku Ketua Désk Pamilu (Pamlihan Umum) Kota Sukabumi ngajelaskeun, angka ilubiung pamilih di Kota Sukabumi dina Pamilu Bareng Taun 2019, nya éta Pamilu Persidén katut Wakil Persidén RI sarta Pamilu Anggota DPR RI, DPD RI, DPRD Provinsi Jawa Barat katut DPRD Kota Sukabumi anu dilaksanakeun tanggal 17 April 2019 nu anyar kaliwat, ngarandapan ngaronjat nya éta ngahontal 85 peresén.

Ěta angka ilubiung pamilih téh, ngaronjat gedéna 7 peresén tina angka ilubiung pamilih dina Pilkada (Pamilihan Kapala Daérah) Bareng Taun 2018 nu geus kaliwat, nya éta Pilkada Gubernur katut Wakil Gubernur Jawa Barat sarta Pilkada Wali Kota katut Wakil Wali Kota Sukabumi anu ngahontal 78 peresén. Salian ti éta, palaksanaan Pamilu Bareng Taun 2019, di Kota Sukabumi dina umumna lumangsung lancar, sarta aman, tartib jeung rukun.

Panjelasan Asistén Pamaréntahan Setda Kota Sukabumi éta téh, ditepikeun basa mingpin apél isuk pagawé di lingkungan Setda Kota Sukabumi katut Diskominfo (Dines Komunikasi jeung Informatika) Kota Sukabumi, tanggal 18 April 2019 anyar-anyar ieu, di Buruan Apél Setda Kota Sukabumi.

Salajuna dijelaskeun, ngaronjatna angka ilubiung pamilih téh, ku ayana kasadaran jeung kadéwasaan sakumna lapisan masarakat Kota Sukabumi dina ngarojong jeung nyukséskeun éta Pamilu, ku cara nyalurkeun kahayang jeung hak pilihna sacara Jurdil (Jujur jeung Adil), sarta LUBER (Langsung, Umum, Bébas jeung Rahasiah).

Sedengkeun lancarna palaksanaan Pamilu Bareng Taun 2019 di Kota Sukabumi téh, ngarupakeun hasil gawé rancagé sakumna pihak, nya éta unsur FKPD (Forum Komunikasi Pingpinan Daérah), Aparat Pamaréntah, Pamilon Pamilu jeung Panyalagara Pamilu, anu ngawengku ti Bawaslu (Badan Pangawas Pamilu), KPU (Komisi Pamilihan Umum), PPK (Panitia Pamilu Kacamatan), PPS (Panitia Pamungutan Soara), KPPS (Kelompok Panyalagara Pamungutan Soara), PPL (Pangawas Pamilu Lapangan), Pamsung (Pangamanan Langsung) jeung Pamyah (Pangamanan Wilayah), Aparat Kapulisian jeung TNI, sarta Aparat Wilayah Kacamatan jeung Kalurahan dina ngalaksanakeun jeung ngawal panyalagaraan éta Pamilu.

Ku sabab kitu, Asistén Pamaréntahan Setda Kota Sukabumi salaku Ketua Désk Pamilu Kota Sukabumi ngahaturkeun nuhun katut layang pangajén anu saluhur-luhurna ka sakumna pihak, anu geus usaha satékah polah ngalaksanakeun jeung ngawal sarta ngarojong jeung nyukséskeun éta Pamilu.

Leave a Reply