JAM GAWÉ ASN SALILA BULAN SUCI ROMADHON TAUN 1440 HIJRIYAH

Reporter/Redaktur/Editor : ENDANG SUMARDI

Wali Kota Sukabumi, H. Achmad Fahmi ngajelaskeun, jam gawé ASN (Aparatur Sipil Nagara) atawa PNS (Pagawé Negri Sipil) di lingkungan Pamaréntah Kota Sukabumi, salila Bulan Suci Romadhon Taun 1440 Hijriyah, nya éta poé Senén nepi ka poé Kemis ti pukul 08.00 nepi ka pukul 15.00 WIB, istirahat ti pukul 12.00 nepi ka pukul 12.30 WIB, sarta poé Jumaah ti pukul 08.00 nepi ka pukul 15.30 WIB, istirahat ti pukul 11.30 nepi ka pukul 12.30 WIB.

Sedengkeun pikeun OPD (Organisasi Parangkat Daérah) anu ngalaksanakeun 6 poé gawé, nya éta poé Senén nepi ka poé Kemis jeung poé Saptu ti pukul 08.00 nepi ka pukul 14.00 WIB, istirahat ti pukul 12.00 nepi ka pukul 12.30 WIB, sarta poé Jumaah ti pukul 08.00 nepi ka pukul 14.30 WIB, istirahat ti pukul 11.30 nepi ka pukul 12.30 WIB.

Ěta katangtuan jam gawé téh, ngacu kana Surat Ědaran MenPAN-RB (Mentri Pandayagunaan Aparatur Nagara jeung Réformasi Birokrasi) RI Nomer 394 Taun 2019, tanggal 26 April 2019, anu ditujukeun ka para Mentri, Kapolri, Panglima TNI, Gubernur, Bupati jeung Wali Kota. Saterusna dijelaskeun, éta katangtuan jam gawé téh geus ditepikeun ka sakumna OPD jeung Instansi Vértikal, sarta Kacamatan jeung Kalurahan nu aya di lingkungan Pamaréntah Kota Sukabumi.

Ku sabab kitu, Wali Kota Sukabumi cumeluk ka sakumna ASN di lingkungan Pamaréntah Kota Sukabumi, sangkan patuh jeung taat sakaligus ngalaksanakeun katangtuan éta jam gawé, salila Bulan Suci Romadhon Taun 1440 Hijriyah. Lian ti éta ogé dijelaskeun, saupama aya ASN nu ngareumpak kana katangtuan éta jam gawé baris ditindak tegas, luyu jeung paraturan katut undang-undang anu ditetepkeun.

Sabab ibadah puasa téh teu meunang dijadikeun alesan pikeun ngurangan kuantitas jeung kualitas palayanan ka sakumna lapisan masarakat, tapi kudu leuwih dironjatkeun sacara optimal. Lantaran digawé ngalayanan masarakat ogé, ngarupakeun bagian tina ibadah. Ku kituna, Wali Kota Sukabumi meredih ka sakumna ASN di lingkungan Pamaréntah Kota Sukabumi, sangkan salawasna usaha satékah polah ngalaksanakeun ibadah sacara hadé jeung husu, sarta balap dina ngalaksanakeun amal kahadéan, pikeun meunang kabarokahan Bulan Suci Romadhon jeung pahala anu manglipet-lipet ti Nu Maha Kawasa.

Leave a Reply