SALAWASNA USAHA SATÉKAH POLAH NGARONJATKEUN PROGRAM SI JEMPOL

Reporter/Redaktur/Editor : ENDANG SUMARDI

Disdukcapil (Dines Kapadumukan jeung Panyatetan Sipil) Kota Sukabumi, salawasna usaha satékah polah ngaronjatkeun jeung ngamekarkeun Program Si Jempol (Siap Jemput Bola) Palayanan Nyieun Dokumén jeung Adminduk (Administrasi Kapadumukan), ka sakumna lapisan masarakat Kota Sukabumi, kaasup dina Bulan Romadhon, salian palayanan régulér anu dilaksanakeun di Kantor Disdukcapil Kota Sukabumi.

Sabab sakumaha anu dijelaskeun ku Kapala Disdukcapil Kota Sukabumi, Iskandar, S.IP., M.T., bulan Romadhon teu meunang dijadikeun alesan pikeun ngurangan kuantitas jeung kualitas palayanan ka masarakat, tapi kudu dironjatkeun jeung dimekarkeun. Lantaran méré palayanan ka masarakat ogé ngarupakeun bagian tina ibadah. Ku kituna, dina Bulan Romadhon Taun 1440 Hijriyah cindekna dina mapag Idul Fitri, pihakna katut réngréngannana tetep ngalaksanakeun Program Si Jempol Palayanan Nyieun Dokumén jeung Adminduk, ka sakumna lapisan masarakat Kota Sukabumi, nya éta Program Si Jempol Ngabuburit Bareng jeung Disdukcapil Kota Sukabumi.

Saterusna dijelaskeun, dina Program Si Jempol Ngabuburit Bareng jeung Disdukcapil Kota Sukabumi téh, pihakna baris ngalaksanakeun gawé bareng jeung pabankan, hususna dina méré palayanan nukeurkeun duit. Kapala Disdukcapil Kota Sukabumi ngaharepkeun, Program Si Jempol Ngabuburit Bareng jeung Disdukcapil Kota Sukabumi téh, meunang pangbagéa anu lain lumayan ti sakumna lapisan masarakat Kota Sukabumi, saperti dina taun-taun saméméhna.

Anapon jenis palayanan Dokumén jeung Adminduk anu dilaksanakeun dina Program Si Jempol Ngabuburit Bareng jeung Disdukcapil Kota Sukabumi téh, diantarana nyieun KTP-él (Kartuh Tanda Padumuk éléktronik), KK (Kartuh Kulawarga), Akteu Kalahiran jeung nu séjénna. Sedengkeun pungsi jeung kagunaan Dokumén jeung Adminduk téh, nya éta sabagé idéntitas diri, pikeun ngarojong ngawujudna data base kapadumukan anu akurat, pikeun ngurus paijinan, muka rékening jeung ngajukeun kiridit ka bank, ngalamar pagawéan, asup Anggota BPJS (Badan Panyalagara Jaminan Sosial) Kaséhatan jeung BPJS Katanagakerjaan, sarta pikeun kaperluan lianna.

Leave a Reply