PAMARÉNTAH KOTA SUKABUMI NYALAGARAKEUN PASAR MURAH ROMADHON TAUN 1440 HIJRIYAH

Reporter/Redaktur/Editor : ENDANG SUMARDI

Pamaréntah Kota Sukabumi ngaliwatan Diskop UKM-PP (Dines Koprasi, Usaha Kecil Manengah, Padagangan jeung Paindustrian) Kota Sukabumi sarta TP PKK Kota Sukabumi, nyalagarakeun Pasar Murah jeung Bazaar Romadhon Taun 1440 Hijriyah, di 4 Kacamatan sa Kota Sukabumi. Sakumaha anu dijelaskeun ku Kapala Diskop UKM-PP Kota Sukabumi, Drs. Ayép Supriatna, M.M., éta Pasar Murah jeung Bazaar téh dijadwalkeun lumangsung salila 8 poé, cindekna ti tanggal 16 nepi ka tanggal 23 Méi 2019, atawa masing-masing kacamatan salila 2 poé séwang.

Nya éta Kacamatan Cibeureum tanggal 14 jeung 15 Méi 2019, di Buruan Kantor Kacamatan Cibeureum, sarta Kacamatan Baros tanggal 16 jeung 17 Méi 2019, di Buruan Kantor Kalurahan Jaya Mekar. Salajuna Kacamatan Lembur Situ tanggal 20 jeung 21 Méi 2019, di Buruan Kantor Kacamatan Lembur Situ, sarta Kacamatan Gunung Puyuh tanggal 22 jeung 23 Méi 2019, di Buruan Kantor Kacamatan Gunung Puyuh.

Anapon barang-barang anu dijual di Pasar Murah jeung Bazaar Romadhon téh, ngawengku Béas, Endog, Gula Pasir, Tipung Tarigu, Suuk meunang meresihan kulitna, Minyak Goréng dina kemasan, sarta rupa-rupa jenis inuman jeung kadaharan siap saji has Kota Sukabumi, Kadaharan Garing, Endog Asin, Baju Muslim jeung barang-barang penting liainna.

Kapala Diskop UKM-PP Kota Sukabumi ngajelaskeun, harga barang-barang anu dijual di Pasar Murah jeung Bazaar Romadhon téh kacida murahna, lantaran anu baralanjana meunang potongan harga atawa diskon. sabab meunang subsidi ti pamaréntah. Salian ti éta ogé dijelaskeun, Pasar Murah jeung Bazaar Romadhon téh, dilaksanakeun sacara rutin satiap taun, di satiap Kacamatan sa Kota Sukabumi, cindekna dina saban bulan Romadhon.

Maksud jeung tujuannana, sabagé sala sahiji upaya pikeun ngawujudkeun aspirasi masarakat Kota Sukabumi, anu ngabogaan kahayang supaya di satiap Kacamatan di Kota Sukabumi dilaksanakeun Pasar Murah jeung Bazaar Romadhon, pikeun ngabantu sakaligus ngahampangkeun kabeurat masarakat, hususna masarakat anu kurang mampuh jeung pangasilannana leutik.

Ngan pikeun bulan RomadhonTaun 1440 Hijriyah ieu mah, kagiatan Pasar Murah jeung Bazaar Romadhon téh ngan ukur dilaksanakeun di 4 kacamatan sa Kota Sukabumi, nya éta di Kacamatan Cibeureum, Kacamatan Baros, Kacamatan Lembur Situ jeung Kacamatan Gunung Puyuh, luyu jeung tinimbangan, kawijakan jeung anggaran nu aya.

Leave a Reply