PAMARÉNTAH KOTA SUKABUMI MÉRÉ DUIT KADEUDEUH KA PARA JUARA MHQ

Reporter/Redaktur/Editor : ENDANG SUMARDI

Pamaréntah Kota Sukabumi méré duit kadeudeuh ka para juara MHQ (Musabaqoh Hifdzil Quran) jeung ka para pangbinana. Ěta duit kadeudeuh anu gedéna Rp. 39 juta téh, dipasrahkeun ku Wakil Wali Kota Sukabumi, H. Andri S. Hamami, S.H., M.H., PLT Sekda (Palaksana Tugas Sekertaris Daérah) Kota Sukabumi, Drs. H. Saléh Makbullah, M.Si., Kapala Kantor Kemenag (Kementrian Agama) Kota Sukabumi, Drs. H. Cholid Mawargi, M.Ag., katut Ketua Umum DKM (Déwan Kamakmuran Masjid) Agung Kota Sukabumi, H. Muhamad Muraz, S.H., M.M., dina kagiatan Tarling (Tarawéh Nguriling) Puteran Ka 10 Tim Safari Romadhon Kota Sukabumi, sakaligus Miéling Nuzulul Quran Taun 1440 Hijriyah, di Masjid Agung Kota Sukabumi.

Anapon anu nepikeun caramah dina éta kasempetan, nya éta Ketua Umum MUI (Majelis Ulama Indonésia) Kota Sukabumi, K.H. Fatullah Mansur, Lc., sarta moderatorna nya éta Ketua FPP (Forum Pondok Pasantrén) Kota Sukabumi, Ustadz Endang Saépulloh.

Dina biantarana, Wakil Wali Kota Sukabumi, H. Andri S. Hamami, S.H., M.H. ngaharepkeun, Pangéling-ngéling Nuzulul Quran téh kudu dijadikeun sarana jeung wahana pikeun terus ngaronjatkeun pamahaman jeung pangamalan eusi kandungan Al-Quran. Sala sahijina nya éta toléransi umat baragama. Saterusna dijelaskeun, tatanan toléransi di Kota Sukabumi geus lumangsung kalayan hadé. Sabagé sala sahiji contohna dina bulan Romadhon, umat non muslim salawasna ngahormat umat Islam anu keur ngalaksanakeun ibadah puasa. Salian ti éta, ogé tatanan kaadilan nu aya dina Al-Quran, dimaknaan adil lain keur diri sorangan tapi keur sakumna jalma.

Disagigireun ti éta ogé dijelaskeun, Pamaréntah Kota Sukabumi luyu jeung visi katut misina, salawana usaha satékah polah nyebarkeun kahadéan, luyu jeung anu diparéntahkeun dina Al-Quran. Ěta hal téh sajalan jeung Téma Pangéling-ngéling Nuzulul Quran, nya éta Ku Miéling Nuzulul Quran, Urang Ronjatkeun Pamahaman jeung Pangamalan Eusi Kandungan Al-Quran, pikeun Ngawujudna Kota Sukabumi anu Réligieus, Ayem jeung Sajahtra.

Sedengkeun Ketua Umum MUI Kota Sukabumi, K.H. Fathullah Mansur, Lc., dina caramahna ngajelaskeun, aya sajumlah kawajiban anu kudu dilaksanakeun ku umat Islam kana Al-Quran. Nya éta kahiji kudu diimanan, saterusna ditarima, dibaca jeung diteuleuman. Salajuna kawajiban ngamalkeun kandungan Al-Quran anu sahadé-hadéna, lantaran ngarupakeun bingbingan ti Alloh, sarta anu pamungkas kawajiban kana Al-Quran téh, nya éta sanggeus diimanan, ditarima, dibaca, diteuleuman jeung diamalkeun téh, nya éta dibéla.

Leave a Reply