ROMADHON NYA ÉTA MOMÉNTUM RÉKONSILIASI

Reporter/Redaktur/Editor : ENDANG SUMARDI

Wakil Wali Kota Sukabumi, H. Andri S. Hamami, S.H., M.H. nandeskeun, Romadhon nya éta moméntum rékonsiliasi sarta momén pikeun ngoméan jeung mageuhan hubungan silaturohim. Ěta panandesan Wakil Wali Kota Sukabumi téh, ditepikeun dina acara silaturohim Taun 1440 Hijriyah atawa Taun 2019 Maséhi, anyar-anyar ieu, di Buruan Apél Setda Kota Sukabumi, diteruskeun Buka Puasa Bareng, Sholat Maghrib jeung Sholat Isya Barjamaah, sarta Tarling (Tarawéh Nguriling) Puteran ka 11 atawa puteran pamungkas, di Masjid Al-Ikhlas Pemda Kota Sukabumi. Sedengkeun anu kapeto jadi Pancaramah, nya éta K.H. Nur Halim, jeung Moderatorna ti STISIP Syamsul Ulum Kota Sukabumi, Muhammad Ilyas, S.IP., S.Ag.

Hadir dina kasempetan éta, unsur Forkopimda (Forum Komunikasi Pimpinan Daérah), Pimpinan jeung Anggota DPRD, PLT Sekda (Palaksana Tugas Sekertaris Daérah), para Asistén Daérah, para Kapala OPD (Organisasi Parangkat Daérah) jeung Instansi Vértikal, para Camat, unsur Muspika (Musawarah Pimpinan Kacamatan) jeung para Lurah. Saterusna jajaran Pangurus MUI (Majelis Ulama Indonésia), Baznas (Badan Amil Zakat Nasional), PMI (Palang Mérah Indonésia), sarta Ormas (Organisasi Kamasarakatan) jeung OKP (Organisasi Kapamudaan).

Salajuna Wakil Wali Kota Sukabumi ngajelaskeun, Romadhon ogé dikenal sabagé bulan tarbiyah jeung bulan atikan. Ku sabab kitu, Wakil Wali Kota Sukabumi umajak ka sakumna lapisan masarakat hususna umat Islam, sangkan diajar dina bulan Romadhon, nya éta diajar ngeunaan kataatan kana hukum. Lantaran dina mangsa puasa, diajarkeun pikeun salawasna taat kana aturan anu geus ditangtukeun ku Alloh.

Disagigireun ti éta, Romadhon ogé ngajarkeun ngeunaan kajujuran. Padahal saupama daék, bisa waé sabari kekemu dina waktu wudhu nginum saleguk atawa dua leguk, da moal aya nu apaleun atawa nu nyahoeun. Tapi éta hal téh teu dilaksanakeun, lantaran saréréa ngabogaan kayakinan, yén Alloh mah maha uninga sarta maha tingali.

Satuluyna Romadhon ogé ngajarkeun kana pentingna jeung éndahna pasatuan jeung sabilulungan. Nya éta Buka Puasa, Sholat Maghrib, Sholat Isya, Sholat Tarawéh jeung Tadarus bareng. Ku lantaran kitu, Wakil Wali Kota Sukabumi meredih ka sakumna umat Islam, pikeun neruskeun tradisi ubudiyah anu hadé dina bulan Romadhon. Salian ti éta, Wakil Wali Kota Sukabumi ogé ngaharepkeun, sangkan sakumna umat Islam asup kana golongan jalma-jalma anu taqwa, anu jaminannana nya éta surga.

Leave a Reply