DINA PANYALAGARAAN OPRASI KETUPAT LODAYA TAUN 2019 BARIS DITERJUNKEUN 800 URANG APARAT GABUNGAN

Reporter/Redaktur/Editor : ENDANG SUMARDI

Dina panyalagaraan Oprasi Ketupat Lodaya Taun 2019, di Kota Sukabumi baris diterjunkeun 800 urang aparat gabungan, anu ngawengku ti Polri, TNI, Sub Den Pom, sarta OPD (Organisasi Parangkat Daérah) jeung instansi nu aya kaitannana di lingkungan Pamaréntah Kota Sukabumi. Ka 800 urang aparat gabungan téh, baris ngamankeun lebaran sarta arus mudik jeung arus balik Idul Fitri Taun 1440 Hijriyah. Anapon kapastian baris diterjunkeunnana aparat gabungan dina éta oprasi téh, katohyan dina Apél Gelar Pasukan Oprasi Ketupat Lodaya Taun 2019, anu dipimpin ku Kapolres Sukabumi Kota, AKBP Susatyo Purnomo Condro, S.H., S.I.K., M.Si., di Terminal Tipeu A K.H. Ahmad Sanusi Kota Sukabumi, cindekna tanggal 28 Méi 2019.

Hadir dina éta kasempetan, Wali Kota Sukabumi, H. Achmad Fahmi, Wakil Wali Kota Sukabumi, H. Andri S. Hamami, S.H., M.H., Dandim 0607 Kota Sukabumi, Létkol Kavaleri Mujahidin, S.Sos., para Kapala OPD jeung instansi nu aya kaitannana, sarta para tamu ondangan lianna.

Dina kasempetan éta, Wali Kota Sukabumi, H. Achmad Fahmi ngajelaskeun, Pamaréntah Kota Sukabumi siap jeung baris salawasna usaha satékah polah ngarojong jeung ngabantu kana palaksanaan Oprasi Ketupat Lodaya Taun 2019. Ku sabab kitu, Pamaréntah Kota Sukabumi geus nyiapkeun rupa-rupa hal anu diperlukeun jeung dibutuhkeun dina palaksanaan éta oprasi, hususna dina pangamanan Idul Fitri sarta arus mudik jeung arus balik lebaran taun 2019. Wali Kota Sukabumi ngaharepkeun, palaksanaan Idul Fitri sarta arus mudik jeung arus balik lebaran taun 2019, di Kota Sukabumi bisa lumangsung sacara hadé jeung lancar, sarta aman, tengtrem, ayem jeung rukun.

Salian ti éta, Wali Kota Sukabumi ogé salawasna cumeluk jeung meredih ka sakumna lapisan masarakat, sangkan ngurangan panggunaan kandaraan hususna roda dua, sarta ngamobilisasi beus atawa angkutan umum pikeun mudik. Maksud jeung tujuannana, pikeun ngurangan kapadetan kandaraan sarta pikeun ngarojong kalancaran jeung kaayeman patali marga.

Sedengkeun Kapolres Sukabumi Kota, AKBP Susatyo Purnomo Condro, S.H., S.I.K., M.Si. ngajelaskeun, Oprasi Ketupat Lodaya Taun 2019 ieu téh, kaayaannana kacida bédana jeung taun-taun saméméhna, lantaran bareng jeung tahapan Pamilu (Pamilihan Umum) Bareng Taun 2019. Ku lantaran kitu, Polres Sukabumi Kota ngalaksanakeun dua oprasi sacara bareng, nya éta Oprasi Mantap Brata jeung Oprasi Ketupat Lodaya Taun 2019. Anapon sala sahiji hal anu jadi pahatian dina éta oprasi téh, nya éta masalah arus patali marga. Ku sabab kitu, Aparat Kapulisian sarta OPD jeung instansi nu aya kaitannana, baris nyiapkeun aksés jalan saarah atawa oné way ti arah Jakarta ka Sukabumi jeung sabalikna, hususna dina mangsa arus mudik jeung arus balik Idul Fitri Taun 1440 Hijriyah.

Salajuna Kapolres Sukabumi Kota cumeluk ka sakumna lapisan masarakat anu rék mudik, sangkan mahatikeun barang-barang anu ditinggalkeun jeung imah dina kaayaan dikonci. Disagigireun ti éta, ogé kandaraan anu digunakeun dina mangsa mudik, kudu layak digunakeun jeung pangandarana kudu séhat. Saterusna diharepkeun, dina kaayaan masih dilaksanakeunnana tahapan Pamilu jeung Bulan Suci Romadhon, henteu dikotoran ku rupa-rupa hal anu teu hadé, sarta kaayaan wewengkon Kota Sukabumi salawasna aya dina kaayaan kondusif.

Leave a Reply