WALI KOTA SUKABUMI NGAHATURKEUN NUHUN KA PATUGAS KABERSIHAN DLH KOTA SUKABUMI

Reporter/Redaktur/Editor : ENDANG SUMARDI

Wali Kota Sukabumi, H. Achmad Fahmi, ngahaturkeun nuhun jeung pangajén anu saluhur-luhurna, ka Patugas Kabersihan DLH (Dines Lingkungan Hidup) Kota Sukabumi, anu salawasna usaha satékah polah ngalaksanakeun tugas meresihan jeung ngangkut runtah saban poé di wewengkon Kota Sukabumi, kaasup dina bulan Romadhon jeung Idul Fitri, anu pamustungannana kabersihan jeung kaéndahan wewengkon Kota Sukabumi bisa dijaga sacara hadé jeung optimal.

Ěta hal téh ditepikeun ku Wali Kota Sukabumi, dina acara halal bi halal anu dilaksanakeun ku DLH Kota Sukabumi, cindekna tanggal 10 Juni 2019 nu anyar kaliwat. Hadir dina kasempetan éta, Wakil Wali Kota Sukabumi, H. Andri S. Hamami, S.H., M.H., katut PLT Sekda (Palaksana Tugas Sekertaris Daérah) Kota Sukabumi, Drs. H. Saléh Makbullah, M.Si.

Dina kasempetan éta, Wali Kota Sukabumi ngajak ka sakumna ASN (Aparatur Sipil Nagara) jeung masarakat Kota Sukabumi, sangkan neruskeun rupa-rupa amal kahadéan anu dilaksanakeun jeung dihangkeutkeun salila bulan Romadhon, saperti sholat barjamaah di masjid jeung tadarus Al-Quran. Salian ti éta, ogé sangkan salawasna usaha satékah polah ngadorong jeung ngaronjatkeun kabiasaan masarakat dina miceun runtah kana tempatna. Salajuna ditandeskeun, Pamaréntah Kota Sukabumi salawasna usaha satékah polah ngungkulan masalah runtah kaasup nyanghareupan kaayaan darurat runtah di wewengkon Kota Sukabumi. Lantaran kaayaan TPA (Tempat Pamiceunan Ahir) Runtah Cikundul, dikira-kira ngan ukur bisa nampung runtah nepi ka ahir taun 2019.

Ku sabab kitu, Wali Kota Sukabumi ngajak ka sakumna lapisan masarakat Kota Sukabumi, sangkan usaha satékah polah ngurangan runtah di lingkungannana masing-masing. Diantarana ku cara milih runtah organik jeung anorganik, pikeun dijadikan pupuk kompos atawa pupuk organik jeung barang-barang karajinan anu ngabogaan ajén ékonomis. Sedengkeun usaha lianna pikeun ngungkulan masalah runtah téh, nya éta ku cara ngalegaan aréal TPA Runtah Cikundul, jeung ngolah runtah saperti di Bogor anu bisa ngolah runtah nepi ka 100 ton dina saban poéna.

Leave a Reply