SAJUMLAH 200 URANG NAPI WARGA BINAAN LAPAS KELAS II B NYOMPLONG KOTA SUKABUMI MEUNANG REMISI HUSUS

Reporter/Redaktur/Editor : ENDANG SUMARDI

Sajumlah 200 urang Napi (Nara Pidana) Warga Binaan Lapas (Lembaga Pamasarakatan) Kelas II B Nyomplong Kota Sukabumi, meunang Remisi Husus atawa Pangurangan Hukuman Husus Idul Fitri Taun 1440 Hijriyah, ti Ditjén Pas (Diréktorat Jéndral Pamasarakatan) Kamentrian Hukum jeung HAM (Hak Asasi Manusa) RI.

Ka 200 urang éta Napi téh meunang remisi husus 1 nya éta 15 poé réana 42 urang, remisi husus 1 nya éta sabulan réana 146 urang, jeung remisi husus 1 nya éta sabulan satengah réana 9 urang, sarta remisi husus 2 nya éta 15 poé réana 2 urang, jeung remisi husus 2 nya éta sabulan saurang. Tina jumlah anu narima éta remisi téh, sajumlah 6 urang Napi dinyatakeun bébas.

Anapon SK (Surat Kaputusan) éta Remisi téh, dipasrahkeun sacara simbolis ku Wali Kota Sukabumi, H. Achmad Fahmi, di Lapas Kelas II B Nyomplong Kota Sukabumi, dibarengan ku Kapala Lapas Kelas II B Nyomplong Kota Sukabumi, Yunianto.

Hadir dina kasempetan éta, Ketua TP PKK Kota Sukabumi, Hj. Fitri Hayati Fahmi, S.Ag., M.M.Pd., Subdempom Sukabumi, para Asistén Setda Kota Sukabumi, para Kapala SKPD (Satuan Kerja Parangkat Daérah) jeung instansi nu aya kaitannana, sarta para tamu ondangan lianna.

Dina kasempetan éta, Wali Kota Sukabumi ngaharepkeun ka sakumna Napi Warga Binaan Lapas Kelas II B Nyomplong Kota Sukabumi anu meunang Remisi Husus atawa Pangurangan Hukuman Husus Idul Fitri Taun 1440 Hijriyah, sangkan dijadikeun anugrah sarta dijadikeun pecut jeung sumanget pikeun terus ngoméan diri jeung intropéksi jadi pribadi anu leuwih hadé, luyu jeung tuntunan katut ajaran agama sarta katangtuan aturan jeung undang-undang anu ditetepkeun dina kahirupan sapopoé.

Sedengkeun ka para Napi anu dinyatakeun bébas, Wali Kota Sukabumi ngaharepkeun, supaya balik deui ka masarakat jeung ka kulawargana masing-masing, dibarengan ku pribadi anu leuwih hadé, sarta ulah balik deui ka Lapas jadi Napi deui.

Salian ti éta, Wali Kota Sukabumi ogé ngajelaskeun, dipasrahkeunnana Remisi Husus Idul Fitri Taun 1440 Hijriyah téh, ngarupakeun sala sahiji wujud nyata pahatian jeung pangajén ti nagara ka para Warga Binaan, boh Napi boh Anak Pidana, sabagé umat anu ngagem agama sarta ngabogaan tingkah polah anu hadé dina salila ngajalankeun pidanana.

Leave a Reply