PAMARÉNTAH KOTA SUKABUMI NYALAGARAKEUN SOSIALISASI PPDB ONLINE TAUN PALAJARAN 2019-2020

Reporter/Redaktur/Editor : ENDANG SUMARDI

Pamaréntah Kota Sukabumi ngaliwatan Dines Pendidikan jeung Kabudayaan Kota Sukabumi, nyalagarakeun sosialisasi PPDB (Penerimaan Peserta Dididk Baru) Online Taun Palajaran 2019-2020, pikeun Tingkat TK, SD jeung SMP, sarta panandatanganan fakta integritas ku sakumna élemén masarakat dina widang atikan. Sedengkeun maksud jeung tujuan dilaksanakeunnana éta sosialisasi téh, nya éta pikeun nyebarkeun béwara ka masarakat Kota Sukabumi, ngeunaan tata cara PPDB Online di Kota Sukabumi.

Ěta sosialisasi anu lumangsung di Rohangan Pasamoan Setda Kota Sukabumi anyar-anyar ieu téh, dibuka sacara resmi ku Wakil Wali Kota Sukabumi, H. Andri S. Hamami, S.H., M.H. Anapon nu hadir dina éta kasempetan, Pupuhu DPRD Kota Sukabumi, Yunus Suhandi, S.IP., unsur Forkopimda (Forum Komunikasi Pimpinan Daérah) Kota Sukabumi, para Kapala OPD (Organisasi Parangkat Daérah), para Camat jeung Lurah, para Kapala TK, SD jeung SMP, sarta para tamu ondangan lianna.

Dina biantarana, Wakil Wali Kota Sukabumi, H. Andri S. Hamami, S.H., M.H. ngaharepkeun, PPDB Online di Kota Sukabumi bisa dilaksanakeun sacara jujur jeung adil sarta profésional. Salian ti éta, ogé bisa nyegah jeung nyingkahan kajadiannana rupa-rupa hal anu teu diharepkeun ku sakumna pihak. Saterusna dijelaskeun, dina éta PPDB téh, diterapkeun sistim zonasi, anu maksud jeung tujuannana pikeun ngaronjatkeun ajén jeung pamarataan atikan, sarta teu ngenal deui sakola favorit. Pikeun ngawujudkeun éta hal téh, diantarana ku  dilaksanakeunnana panandatanganan fakta integritas ku sakumna élemén masarakat dina widang atikan.

Sedengkeun Kapala Dines Pendidikan jeung Kabudayaan Kota Sukabumi, Drs. Dudi Fathul Jawad, M.Pd. ngajelaskeun, dina taun ieu PPDB pikeun Tingkat TK, SD jeung SMP di Kota Sukabumi, dilaksanakeun ku cara sistim online jeung zonasi. Kapala Dines Pendidikan jeung Kabudayaan Kota Sukabumi ngaharepkeun, ku cara jeung éta sistim téh, PPDB di Kota Sukabumi bisa leuwih hadé, lantaran dilaksanakeun sacara jujur jeung adil. Satuluyna dijelaskeun, PPDB pikeun Tingkat TK jeung SD dilaksanakeun diluar jejaring atawa off line, ku cara ngutamakeun zonasi tempat padumukan. Anapon pandaftaran pikeun Tingkat TK nya éta tanggal 24 Juni nepi ka tanggal 3 Juli 2019, jeung pangumumannana tanggal 6 Juli 2019. Salajuna pandaftaran pikeun Tingkat SD tanggal 24 nepi ka tanggal 29 Juli 2019, sarta pangumumannana tanggal 6 Juli 2019.

Saterusna pikeun Tingkat SMP dilaksanakeun ku cara sistim zonasi, jalur prestasi akademik jeung non akademik sarta kapindahan tugas orang tua siswa. Sedengkeun pandaftaran pikeun jalur prestasi jeung kapindahan tugas orang tua siswa tanggal 17 nepi ka tanggal 20 Juni 2019, sarta pikeun sistim zonasi tanggal 24 nepi ka tanggal 29 Juni 2019. Anapon pangumumannana pikeun jalur prestasi jeung kapindahan tugas orang tua siswa tanggal 25 Juni 2019, sarta pikeun sistim zonasi tanggal 6 Juli 2019.

Salajuna PPDB pikeun Tingkat SMA ngaliwatan sistim zonasi jeung non zonasi, sarta pikeun Tingkat SMK ngaliwatan Nilai UAS BN (Ujian Ahir Sakola Berstandar Nasional) atawa NEM (Nilai Ebtanas Murni).

Leave a Reply