SUMANGET IDUL FITRI KUDU DIPATRI DINA SATIAP DIRI UMAT ISLAM

Reporter/Redaktur/Editor : ENDANG SUMARDI

Wakil Wali Kota Sukabumi, H. Andri S. Hamami, S.H., M.H. ngaharepkeun, sumanget Idul Fitri kudu dipatri dina satiap diri umat Islam, hususna dina satiap diri pagawé di lingkungan Pamaréntah Kota Sukabumi, kaasup di lingkungan Sekertariat DPRD Kota Sukabumi, ku cara salawasna handap asor pikeun ménta dihampura jeung silih hampura, sakaligus ngajaga tali silaturohim, nguatan kakompakan jeung sabilulungan, sarta pasatuan jeung kasatuan.

Harepan Wakil Wali Kota Sukabumi éta téh, ditepikeun basa ngahadiran acara Halal Bi Halal anu dilaksanakeun ku DPRD Kota Sukabumi, sawatara poé ka tukang, di Gedong DPRD Kota Sukabumi. Hadir dina éta kasempetan, Kapolres Sukabumi Kota, AKBP Susatyo Purnomo Condro, S.H., S.I.K., M.Si., Kapala Kajaksaan Negri Sukabumi, Ganora Zarina, S.H., M.M., Pingpinan katut Anggota DPRD Kota Sukabumi, Sekertaris DPRD Kota Sukabumi, Asép L. Sukmana, S.H., M.Si., sarta para pagawé di lingkungan Sekertariat DPRD Kota Sukabumi.

Dina éta kasempetan, Wakil Wali Kota Sukabumi ogé ngucapkeun rasa sukur masih ditepungkeun sakaligus ngalaksanakeun silaturohim dina bulan Syawal taun ieu, bari neda dihampura jeung silih hampura, boh sacara pribadi jeung kulawarga boh sabagé Wakil Wali Kota Sukabumi.

Hal éta téh jadi kabahagiaan jeung kagumbiraan dina taun munggaran ngalaksanakeun tugas sabagé Wakil Wali Kota Sukabumi, sakaligus ngajelaskeun, yén acara Halal Bi Halal téh kacida pentingna dilaksanakeun. Sabab bisa ngajaga jeung ngaronjatkeun silaturohim, nguatan kakompakan jeung sabilulungan, sarta pasatuan jeung kasatuan.

Salian ti éta, Wakil Wali Kota Sukabumi ogé ngaharepkeun, momén bulan Syawal téh supaya dijadikeun sarana jeung wahana pikeun ngaronjatkeun sumanget, hususna dina ngaronjatkeun kinerja pikeun para pagawé di lingkungan Pamaréntah Kota Sukabumi, kaasup di lingkungan Sekertariat DPRD Kota Sukabumi jeung DPRD Kota Sukabumi. Lantaran éta hal téh, luyu jeung harti bulan Syawal, nya éta paningkatan atawa ngaronjatkeun.

Leave a Reply