PERAN MUI KACIDA PENTINGNA HUSUSNA DINA MÉRÉ NASÉHAT JEUNG FATWA

Reporter/Redaktur/Editor : ENDANG SUMARDI

Wali Kota Sukabumi, H. Achmad Fahmi nandeskeun, peran MUI (Majelis Ulama Indonésia) kacida pentingna, hususna dina méré naséhat jeung fatwa ka masarakat anu ngabutuhkeun bingbingan jeung tungtunan ajaran Islam. Disagédéngeun ti éta, MUI ogé ngabogaan peran dina sagala rupa prosés ibadah jeung pamanggih, panghubung antara ulama, zuama katut cendikiawan Islam jeung umaro, sarta ilubiung sacara aktif dina ngajaga kondusifitas wewengkon.

Panandesan Wali Kota Sukabumi éta téh, ditepikeun dina acara Silaturahmi Idul Fitri Taun 1440 Hijriyah, anu dilaksanakeun ku MUI Kota Sukabumi, anyar-anyar ieu, di Gedong Pusat Kajian Islam Kota Sukabumi. Hadir dina kasempetan éta, unsur Forkopimda (Forum Komunikasi Pimpinan Daérah) Kota Sukabumi, para Kapala OPD (Organisasi Parangkat Daérah) jeung instansi nu aya tumalina, sarta para alim ulama jeung para tamu ondangan lianna.

Salajuna ditandeskeun, kolaborasi jeung MUI téh, bisa ngarojong kana kalancaran pangwangunan jeung agénda dina sagala widang. Anapon agénda anu anyar-anyar ieu dilaksanakeun ku pamaréntah jeung sakumna lapisan masarakat, nya éta runtuyan pésta démokrasi anu kacida panjangna, nya éta ti mimiti Pilkada (Pamilihan Kapala Daérah), Pileg (Pamilihan Legislatif) jeung Pilpres (Pamilihan Persidén), geus dilaksanakeun babarengan jeung aman.

Ěta hal téh bisa ngawujud, nya éta ku cara gawé anu rancagé jeung gawé sacara ihlas ti sakumna pihak, kaasup MUI, sarta hasilna kacida ngagumbirakeunnana pikeun sakumna pihak, nya éta Kota Sukabumi jadi kota anu pang kondusifna di Jawa Barat.

Ku sabab kitu, éta hal téh sangkan salawasna dijaga jeung dipiara, sakaligus dironjatkeun jeung dimekarkeun ku sakumna pihak. Maksud jeung tujuannana, pikeun ngarojong kalancaran sakumna pihak, hususna dina usaha ngahontal jeung ngawujudkeun Kota Sukabumi anu Réligieus, Ayem jeung Sajahtra.

Anapon définisi Ayem téh, nya éta masarakat ngarasa senang jeung bahagia, sarta teu sieun ngalaksanakeun hubungan social. Ku lantaran kitu, Pamaréntah Kota Sukabumi jeung sakumna aparat kaamanan, satiap peuting ngalaksanakeun kolaborasi kaamanan, pikeun nerjemahkeun jeung ngawujudkeun kalimat ayem.

Leuwih jauh Wali Kota Sukabumi nandeskeun, momén silaturahmi jeung halal bi halal téh, bisa nguntun sabilulungan jeung pamaréntah sarta sakumna OPD jeung instansi nu aya kaitannana, hususna dina némbongkeun solidaritas jeung sakumna élemén masarakat, kaasup dina ngajaga jeung ngaronjatkeun kondusifitas wewengkon.

Dina kasempetan éta, Wali Kota Sukabumi, H. Achmad Fahmi, dibarengan ku Kapolres Sukabumi Kota, AKBP Susatyo Purnomo Condro, S.H., S.I.K., M.Si. jeung Ketua Baznas (Badan Amil Zakat Nasional) Kota Sukabumi, Ir. H. Fifi Kusumajaya, M.M., sacara simbolis masrahkeun bantuan pikeun ngoméan Rutilahu (Rumah Tidak Layak Huni), ti Baznas Kota Sukabumi ka masarakat Kota Sukabumi.

Leave a Reply