WALI KOTA SUKABUMI GEUS NANDATANGAN DOKUMÉN RANCANA AKSI DAÉRAH TAUN 2019-2020

Reporter : ARIF HIDAYAT

Redaktur/Editor : ENDANG SUMARDI

Wali Kota Sukabumi, H. Achmad Fahmi, geus nandatangan Dokumén Rancana Aksi Daérah Pamaréntah Kota Sukabumi Taun 2019-2020, sabagé bagian tina rancana aksi daérah dina usaha nyegah jeung numpes koropsi di lingkungan Pamaréntah Kota Sukabumi. Panandatanganan anu lumangsung di Rohangan Pasamoan Setda Kota Sukabumi sawatara poé ka tukang téh, disaksian ku Wakil Wali Kota Sukabumi, H. Andri S. Hamami, S.H., M.H., PLT Sekda (Palaksana Tugas Sekertaris Daérah) Kota Sukabumi, Drs. H. Saléh Makbullah, M.Si., sarta Ketua Tim Kosuga (Koordinasi, Supervisi jeung Panyegahan) KPK (Komisi Pangbarantasan Koropsi) Wilayah Jawa Barat, Tri Budi Rochmanto. Hadir dina kasempetan éta, para Asistén Setda Kota Sukabumi, para Kapala SKPD (Satuan Kerja Parangkat Daérah), jeung para tamu ondangan lianna.

Dina biantarana, Wali Kota Sukabumi ngucapkeun rasa sukur, lantaran rancana aksi daérah ieu téh bisa ditandatangan jeung disaluyuan, sabagé sala sahiji bentuk komitmen dina ngajaga imah badag Pamaréntah Kota Sukabumi, kaasup sakumna SKPD anu nyieun komitmen. Salian ti éta, ogé jadi bekel pikeun Wali Kota katut Wakil Wali Kota Sukabumi, dina ngajaga komitmen sakaligus nyegah jeung numpes koropsi di lingkungan Pamaréntah Kota Sukabumi.

Saterusna dijelaskeun, ieu amanah téh baris dicekel pageuh jeung dijaga sahadé-hadéna, sakaligus ngalaksanakeun gawé bareng jeung sabilulungan anu hadé, sarta silih ingetan anu bisa jeung anu teu bisa dilaksanakeun, luyu jeung aturan katut undang-undang anu ditetepkeun. Disagigireun ti éta ogé dijelaskeun, Pamaréntah Kota Sukabumi baris salawasna usaha satékah polah ngalaksanakeun éta komitmen, sarta ngoméan jeung ngaronjatkeun palayanan ka masarakat kanu leuwih hadé deui, luyu jeung harepan sakumna pihak.

Sedengkeun Ketua Tim Kosuga KPK Wilayah Jawa Barat, Tri Budi Rochmanto ngjelaskeun, KPK baris salawasna usaha satékah polah ngadorong panyegahan jeung pangbarantasan koropsi di daérah, kaasup di Kota Sukabumi. Carana ku ngagiatkeun sosialisasi sarta ngaronjatkeun pamahaman kana ngeunaan panyegahan jeung pangbarantasan koropsi. Salajuna dijelaskeun, aya sababaraha prakték anu kudu salawasna disingkahan dina tata kalola pamaréntahan. Diantarana duit ketuk palu jeung alokasi dana pokir, lantaran taya dasar hukumna dina parancanaan APBD (Anggaran Pandapatan jeung Balanja Daérah). Lian ti éta, ogé usaha ilubiung dina ngayakeun barang jeung jasa katut paijinan, jual beuli jabatan, biaya panempatan pagawé. rotasi jeung mutasi pagawé, pungutan atawa kutipan ka bawahan, méré atawa narima sogok, sarta gratifikasi jeung meres.

Leave a Reply