PANGWANGUNAN SUKABUMI CITY HUB BISA NGAROJONG KANA PANINGKATAN PAÉKONOMIAN

Reporter/Redaktur/Editor : ENDANG SUMARDI

Sakumaha anu dijelaskeun ku Wakil Wali Kota Sukabumi, H. Andri S. Hamami, S.H., M.H., Pangwangunan Sukabumi City Hub bisa ngarojong kana paningkatan paékonomian. Ku sabab kitu, Pamaréntah Kota Sukabumi baris usaha satékah polah ngarojong kana éta pangwangunan. Anapon éta pangwangunan téh, nurutkeun rancanana baris dilaksanakeun dina lahan salega 3,3 héktar, cindekna di kawasan Terminal Tipeu A K.H. Ahmad Sanusi Kota Sukabumi.

Panjelasan Wakil Wali Kota Sukabumi éta téh, ditepikeun dina sosialisasi panajeman pangwangunan Sukabumi City Hub, di Hotél Horison Kota Sukabumi, anyar-anyar ieu. Hadir dina kasempetan éta, Kapala Balé Pangalola Transportasi Darat Wilayah IX Provinsi Jawa Barat, Drs. Agung Rahardjo, MSTr., katut Kapala Dines Pahubungan Kota Sukabumi, Abdul Rachman, A.TD.

Saterusna dijelaskeun, éta pangwangunan téh pikeun ngarojong kasiapan Kota Sukabumi, dina nyanghareupan réngséna 3 méga proyék pangwangunan, nya éta Jalan Tol Bocimi (Bogor-Ciawi-Sukabumi), double track atawa jalur ganda Karéta Api Bogor-Sukabumi, jeung Bandara Sukabumi.

Salian ti éta ogé dijelaskeun, dina éta pangwangunan téh, baris diwangun Hotél, Bioskop, Puseur Pabalanjaan UKM (Usaha Kecil jeung Manengah), sarta Terminal Terpadu. Leuwih jauh dijelaskeun, éta pangwangunan téh baris dilaksanakan ku invéstor, maké sistim BOT (Build Operate Transfer). Ngan BUMD (Badan Usaha Milik Daérah) ogé baris dilibetkeun.

Wakil Wali Kota Sukabumi ngajelaskeun, éta pangwangunan téh danget ieu kakara nepi kana tahap kajian jeung pamasrahan rancana pangwangunan ti konsultan invéstor. Wakil Wali Kota Sukabumi ngaharepkeun, saupama rancana sagemblengna geus réngsé, pangwangunannana sangkan sagancangna dilaksanakeun. Lian ti éta ogé diharepkeun, éta pangwangunan téh bisa mecah puseur karaméan di Kota Sukabumi.

Salajuna dijelaskeun, salian di Kota Sukabumi, éta Pangwangunan City Hub téh baris dilaksanakeun di daérah séjénna, nya éta di Cirebon jeung Sumedang. Ngan Kota Sukabumi diajén ku Kemenhub (Kementrian Pahubungan) leuwih siap, anu panustrungannana pangwangunannana baris diheulakeun.

Sedengkeun Kapala Balé Pangalola Transportasi Darat Wilayah IX Provinsi Jawa Barat, Drs. Agung Rahardjo, MSTr. ngajelaskeun, Terminal Tipeu A K.H. Ahmad Sanusi Kota Sukabumi téh kudu dironjatkeun jeung dimekarkeun, hususna ngeunaan kinerja jeung palayanannana ka masarakat, ka nu leuwih hadé deui.

Sala sahijina ku cara ngoméan jeung ngaronjatkeun rupa-rupa sarana jeung pasilitas terminalna, leuwih-leuwih dina taun hareup. Sabab taun hareup téh ngarupakeun mangsa kabangkitan terminal.

Ku lantaran kitu, dina taun hareup mah sakumna terminal téh kudu leuwih hadé jeung modéren, sarta palayanannana ogé kudu leuwih gancang. Salian ti éta, sarana jeung pasilitasna ogé kudu leuwih hadé jeung nyumponan kabutuhan.

Leave a Reply