WALI KOTA SUKABUMI GEUS NYUMPAH JEUNG NGISTRÉNAN 49 PAJABAT

Reporter/Redaktur/Editor : ENDANG SUMARDI

Wali Kota Sukabumi, H. Achmad Fahmi, geus nyumpah jeung ngistrénan 49 pajabat di lingkungan Pamaréntah Kota Sukabumi, anu ngawengku ti para Pajabat Tinggi Pratama, para Kapala SD, Pajabat Fungsional, jeung Diréktur BUMD (Badan Usaha Milik Daérah), di Gedong Juang 45 Kota Sukabumi.

Anapon ka 49 éta pajabat téh, nya éta Sekda (Sekertaris Daérah) Kota Sukabumi, Drs. H. Dida Sembada, M.M., Kapala Disdalduk, KB, P3A jeung PM (Dines Pangadalian Padumuk, Kulawarga Berencana, Pangbardayaan Perempuan, Palindungan Anak jeung Pangbardayaan Masarakat) Kota Sukabumi, Hj. Nuraéni Komarudin, S.IP., M.Si., Kapala Disnaker (Dines Tanaga Kerja) Kota Sukabumi, Drs. H. Didin Syarifudin, M.Si., Kapala Dinsos (Dines Sosial) Kota Sukabumi, dr. Hj. Rita Fitrianingsih, M.Kes., Asistén Paékonomian jeung Pangwangunan Setda Kota Sukabumi, Ir. H. Cécép Mansur, M.M., 40 Kapala SD, 3 Pajabat Fungsional, jeung Diréktur PDAM TBW (Pausahaan Daérah Air Minum Tirta Bumi Wibawa) Kota Sukabumi, Ir. Abdul Kholik Faddawani, M.M.

Hadir dina kasempetan éta, Wakil Wali Kota Sukabumi, H. Andri S. Hamami, S.H., M.H., unsur Forkopimda (Forum Komunikasi Pimpinan Daérah) Kota Sukabumi, Pingpinan katut Anggota DPRD Kota Sukabumi, Ketua TP PKK katut DWP (Dharma Wanita Pasatuan) Kota Sukabumi, para Kapala OPD (Organisasi Parangkat Daérah), para Camat jeung Lurah, sarta para tamu ondangan lianna.

Dina bintarana, Wali Kota Sukabumi kalayan asmana pribadi katut Kapala Daérah sarta Pamaréntah Kota Sukabumi, ngawilujengkeun ka para éta pajabat sakaligus ngaharepkeun, sangkan bisa ngajalankeun tugas jeung amanah anu sahadé-hadéna, luyu jeung katangtuan aturan katut undang-undang anu ditetepkeun.

Salajuna dijelaskeun, dilaksanakeunnana pangistrénan ka para pajabat tinggi pratama téh, didasarkeun kana hasil prosés seléksi jabatan anu kacida panjangna, sarta tahapannana disaluyukeun jeung katangtuan anu kaunggel dina Undang-Undang Nomer 5 Taun 2015 ngeunaan ASN (Aparatur Sipil Nagara), jeung PP (Paraturan Pamaréntah) Nomer 11 Taun 2017 ngeunaan Manajemén PNS (Pagawé Negri Sipil).

Lian ti éta ogé dijelaskeun, prosés jeung tahapan seléksi éta jabatan téh ngabutuhkeun waktu lilana nepi ka sabulan. Saterusna Pamaréntah Kota Sukabumi ngajukeun Surat Rékoméndasi ka Gubernur Jawa Barat ogé ngabutuhkeun waktu. Satuluyna ménta Rékoméndasi ka Komisi Aparatur Sipil Nagara, anu pamustungannana prosés jeung tahapan seléksi éta jabatan téh ngabutuhkeun waktu anu kacida panjangna, sarta seléksina dilaksanakeun sacara nembrak jeung akuntabel.

Disagigireun ti éta ogé dijelaskeun, dumasar kana Undang-Undang jeung Paraturan Pamaréntah, Kapala Daérah meunang mandatori sabagé PPK (Pajabat Pangbina Kapagawéan), nya éta pikeun Pajabat Tinggi Pratama, tina tilu urang hasil seléksi kudu dipilih saurang anu panhadéna. Kaasup panetepan pikeun Diréktur PDAM TBW Kota Sukabumi, dibentuk Timsel (Tim Seléksi) ti rupa-rupa unsur, supaya bisa ngahasilkeun anu panghadéna.

Leave a Reply