IIDI CABANG KOTA SUKABUMI BISA NGAROJONG KANA PANINGKATAN PALAYANAN DINA WIDANG KASÉHATAN

Reporter/Redaktur/Editor : ENDANG SUMARDI

Wali Kota Sukabumi, H. Achmad Fahmi ngaharepkeun, IIDI (Ikatan Istri Dokter Indonésia) Cabang Kota Sukabumi bisa ngarojong kana paningkatan palayanan dina widang kaséhatan. Hal éta téh luyu jeung Visi Pangwangunan Kota Sukabumi Taun 2005-2025, nya éta Ngawujudna Kota Sukabumi Sabagé Puseur Palayanan anu hadé dina Widang Atikan, Kaséhatan jeung Padagangan di Jawa Barat, anu didadasaran ku Iman jeung Taqwa.

Ěta harepan téh ditepikeun dina acara Pangesahan Pangurus Anyar IIDI Cabang Kota Sukabumi, mangsa bakti taun 2018-2021, di Hotél Balcony Kota Sukabumi. Hadir dina kasempetan éta, Ketua Umum PB (Pangurus Besar) IIDI, Murniati Umbas, katut para tamu ondangan lianna.

Saterusna diharepkeun, ku dibentuk jeung disahkeunnana pangurus anyar téh, IIDI Cabang Kota Sukabumi bisa ngabelesat jeung maju deui ti taun-taun saméméhna, utamana dina ngalaksanakeun peran, pungsi jeung tugasna ngamajukeun jeung ngaronjatkeun pangwangunan dina widang kaséhatan. Komo deui widang kaséhatan téh, jadi sala sahiji program prioritas pangwangunan, boh Persidén katut Gubernur boh Bupati katut Wali Kota, kaasup widang atikan jeung paningkatan paékonomian.

Anapon sala sahiji hal anu bisa ngadongkrak jeung ngaronjatkeun pangwangunan dina widang kaséhatan téh, nya éta ayana para tanaga médis, diantarana dokter. Ku sabab kitu, peran, pungsi jeung tugas para istri dokter téh kacida pentingna, hususna dina ngarojong sakaligus ngamajukeun jeung ngaronjatkeun pangwangunan dina widang kaséhatan.

Sedengkeun Ketua IIDI Cabang Kota Sukabumi, Téti Wibisono ngajelaskeun, IIDI Cabang Kota Sukabumi salawasna usaha satékah polah ngalaksanakeun rupa-rupa program jeung kagiatan kaséhatan di masarakat. Diantarana Seminar Kaséhatan, Pangbinaan Posyandu jeung Panyuluhan Kaséhatan di sakola.

Lian ti éta, ogé méré santunan ka disabiltas nétra, bantuan ka masarakat anu jadi korban bencana alam, méré sangu bungkus ka para pasén teu mampuh gawé bareng jeung RSUD (Rumah Sakit Umum Daérah) R. Syamsudin, S.H. Kota Sukabumi, sarta méré bantuan atikan ka para palajar anu kurang jeung teu mampuh, ngaliwatan YL GN-OTA (Yayasan Lembaga Gerakan Nasional Orang Tua Asuh) Kota Sukabumi. Sedengkeun ka hareupna, IIDI Cabang Kota Sukabumi arék ngagulirkan program jeung kagiatan unggulan, gawé bareng jeung Pamaréntah Kota Sukabumi katut IDI (Ikatan Dokter Indonésia) Cabang Kota Sukabumi.

Leave a Reply