SAJUMLAH 3 WEWENGKON DI KOTA SUKABUMI BARIS DITATA DEUI

Reporter/Redaktur/Editor : ENDANG SUMARDI

Kapala Bagian Paékonomian, Pangwangunan jeung Kerja Sama Daérah Setda Kota Sukabumi, Rahmat Sukandar, S.Si., M.T., M.Sc. ngajelaskeun, sajumlah 3 wewengkon di Kota Sukabumi, nya éta wewengkon Lapangan Merdéka, Alun-Alun jeung Jalan Ir. H. Djuanda, nurutkeun rarancang baris ditata deui dina bulan Agustus 2019 nu bakal datang.

Panataan ka 3 éta wewengkon téh, baris diwaragadan tina dana Bantuan Kauangan Pamaréntah Provinsi Jawa Barat Taun Anggaran 2019, anu gedéna ngahontal Rp. 18 miliar. Diantarana pikeun nata Lapangan Merdéka gedéna Rp. 7,5 miliar jeung pedestrian Lapangan Merdéka gedéna Rp. 2,5 miliar, sarta pikeun nata Alun-Alun gedéna Rp. 5 miliar, jeung pikeun nata Jalan Ir. H. Djuanda gedéna Rp. 3 miliar.

Anapon usaha pikeun ngarojong kana kalancaran palaksanaan panataan ka 3 éta wewerngkon téh, pihak Bagian Paékonomian, Pangwangunan jeung Kerja Sama Daérah Setda Kota Sukabumi, geus ngalaksanakeun rupa-rupa pasiapan, kaasup nyiapkeun DĚD (Detail Engineering Design) jeung lélang proyékna.

Salajuna diharepkeun, saupama patanaan ka 3 éta wewengkon téh geus réngsé dilaksanakeun, bisa jadi KSDP (Kawasan Strategis Destinasi Pariwisata) di Kota Sukabumi, sarta jadi daya tarik keur para wisatawan pikeun ngadongdon Kota Sukabumi, salian ti Obyék Wisata Pamandian Cai Panas Cikundul jeung nu séjénna.

Kapala Bagian Paékonomian, Pangwangunan jeung Kerja Sama Daérah Setda Kota Sukabumi ngungkabkeun, nagara-nagara maju anu disorot ku rupa-rupa pihak di sakuliah dunya dina danget ieu, nya éta ngeunaan kahasilan dina ngamajukeun jeung ngaronjatkeun sarta ngamekarkeun obyék wisata di nagarana séwang-séwangan.

Saterusna dijelaskeun, éta hal téh jadi pecut jeung panghudang sumanget pikeun Pamaréntah Kota Sukabumi, hususna dina ngagali poténsi sakaligus ngamajukeun jeung ngaronjatkeun sarta ngamekarkeun obyék wisata di Kota Sukabumi. Diantarana ku cara ngalaksanakeun panataan deui Lapangan Merdéka, Alun-Alun jeung Jalan Ir. H. Djuanda.

Leave a Reply