WALI KOTA SUKABUMI NGAROJONG PANGEMBANGAN KOTA CERDAS

Reporter/Redaktur/Editor : ENDANG SUMARDI

ITB  (Institut Téknologi Bandung) nyalagarakeun deui RKCI (Risét jeung Rating Kota Cerdas Indonésia) Ka 3 Taun 2019, anu lumangsung di Istana Wakil Persidén RI, Jakarta Pusat, anyar-anyar ieu. Anapon maksud jeung tujuan dilaksanakeunnana RKCI téh, nya éta pikeun maluruh jeung nganyahokeun progrés pangembangan kota di Indonésia, hususna nu aya kaitannana jeung paningkatan ajén kahirupan kota ngaliwatan usaha jeung solusi kota cerdas.

Ěta kagiatan téh dibuka sacara resmi ku Wakil Persidén RI, Jusuf Kalla. Dina kasempetan éta, Wakil Persidén ngajelaskeun, masalah anu disanghareupan ku satiap kota anu mekar dina danget ieu, nya éta masalah anu dipangaruhan ku paktor urbanisasi.

Hadir dina kasempetan éta, Anggota DPR RI, Fadél Muhammad, Mentri Dalem Negri, Tjahjo Kumulo, MenPAN-RB, Syafruddin, Réktor ITB, Kadarsah Suryadi, Ketua Apeksi (Asosiasi Pemerintah Kota Seluruh Indonésia), Airin Rachmi Diani, para Wali Kota katut para tamu ondangan lianna.

Wali Kota Sukabumi, H. Achmad Fahmi ngajelaskeun, dilaksanakeunnana RKCI téh ngarupakeun gawé bareng ITB jeung Apeksi, pikeun ngalaksanakeun risét jeung panalitian ka sakumna kota dina ngalaksanakeun pangwangunan, sarta kawijakan dina ngaronjatkeun ajén pangwangunan anu ngabogaan basis téknologi.

Saterusna dijelaskeun, éta kagiatan téh dilaksanakeun ti bulan Juli nepi ka bulan Nopémbér 2019 nu bakal datang, pikeun ngarojong transpormasi nuju Smart X, anu targét jeung sasaran pamilonna nya éta organisasi pamaréntah daerah atawa startup. Salian ti éta ogé dijelaskeun, dilaksanakeunnana kagiatan RKCI téh pikeun niténan kaunggulan jeung kalemahan sakumna kota, dina ngaronjatkeun ajén pangwangunan anu ngabogaan basis téknologi.

Sedengkeun Réktor ITB, Kadarsah Suryadi ngajelaskeun, kagiatan RKCI téh pikeun ngagambarkeun sakumna kota nuju kota cerdas. Lain pikeun néangan kota anu unggul, tapi pikeun ngagambarkeun kaayaan satiap kota. Saterusna Réktor ITB ngaharepkeun, sakumna kota jeung kabupatén di Indonésia bisa maju tanpa aya jurang pamisah.

Leave a Reply